WILLEMSTAD.- Yvonne Wolthuis-Olf di Fundashon Hende-i-Medio-Ambiente (HiMA) no ta di akuerdo ku e manera ku gobièrnu ta atendé ku e problema ku hopi famia riba nos isla no tin akseso na awa limpi. Djamars último minister Ruthmilda Larmonie-Cecilia di Desaroyo Sosial, Labor i Bienestar (SOAW) a lansa un link ku yama awa.soaw.info pa esnan ku no tin awa por keda rekonektá atrobe riba e ret di awa di Aqualectra.
Fundashon HiMA ta lucha pa basta tempu pa tur famia riba nos isla tin akseso na awa limpi. Segun Wolthuis-Olf di e fundashon e akshon di ministerio ta algu positivo, pero no ta sufisiente. “Mi ta lamentá ku den e akshon ministerio ta bisa, entre otro, ku tin hende ku ta biba den kasnan ku ta ilegal ku awor no tin awa. Tambe tin hende ku tin debe grandi na Aqualectra.” Fundashon HiMA ta di opinion ku gobièrnu no mester akusá i ataká e hende mas vulnerabel riba nos isla. “Gobièrnu mester bin ku un maneho mas mihó pa yuda hende i pa evitá ku nan awa ta wòrdu será.” Wolthuis-Olf ta papia entre otro di un sistema ku ta evitá ku hende ta haña un debe grandi. Tambe e ta enfatisá ku hopi hende ku tiki rekurso ta biba den kaso ku ta konstruí ilegal. “Tin hende ku ta biba den e kasnan pa hopi tempu. Na un dado momento gobièrnu mester ta mas proaktivo pa hende no tin ku biba den situashon malu.”
Banda di esei Wolthuis-Olf ta lamentá ku gobièrnu no a reakshoná mas trempan. “Ombudsman den aña 2012 a manda un karta di urgensia na gobièrnu tokante e problema ku tin hopi famia ta biba sin awa. E aktual minister Larmonie-Cecilia tabata den gabinete ocho aña pasa kaba. E problema tabata konosí. Pa ki motibu nan no a aktuá mas trempan?”
Wes a invitá Fundashon HiMA pa bin korte dia 20 di febrüari 2023 pa deliberá tokante e kaso ku nan a entamá. E Fundashon ke urgi gobièrnu pa bin ku un maneho pa tur hende tin akseso na awa limpi. “Nos lo sigui ku e kaso i nos ta spera ku 20 di febrüari nos por papia ku wes i representante di gobièrnu.” E echo ku ministerio awor ta tuma akshon ta algun positivo, segun Wolthuis-Olf. “Pero nos lo sigui ku nos lucha.”
