WILLEMSTAD.- Djasabra 2 mart próksimo lo tin Marcha di Banda Bou pa di 50 biaha. Ta un tradishon ku un públiko grandi ta asistí aló largu di e ruta pa asina por disfrutá di e marcha i vários ta esnan ku ta bini Banda Bou pa gosa di e marcha.
Fundashon Karnaval Banda Bou a tene un konferensiá di prensa na nan Sede na Barber pa por a duna tur informashon pa e último detaye pa e preparashonnan. Presente na e konferensiá di prensa tabata sr. Zwerwer representando Kuerpo Polisial, sr. Wilson di Brantwer i sr. Silberi di Autobus Bedrijf Curaçao.
Señor Silberi di ABC a splika tokante di kambio di orario di e diferente konvoinan na momento ku e kayanan wòrdu será, i e ruta ku e konvoinan lo kore. Sr. Wilson di e kuerpo di Brantwer a duna splikashon di e importansia di e “Brandblusser” riba kada vehíkulo ku ta partisipá den e marcha, tambe pa esnan ku ta bende kos kantu di kaminda, no por Parker outo riba “BrandPutten”.
Señor Zwerwer di Kuerpo Polisial a duna informashon di e orarionan ku lo será kaya, no ta permití pa pone outo riba e alsera nan kantu di kaminda, entre Kaya Prospero Royer i Kaya Johannes Francisca, si mester parker outo nan ta wòrdu kita dor di Polis.
For di 7 or di mainta ta será e kaya nan banda di Barber te ku Seru di Molina i for di 12 or di mèrdia ta será tur e otro via nan ku ta kondusí riba e ruta di e salida di e Marcha. Tur vehíkulo ku ta partisipá den e marcha mester pasa via di Krakeel pa asina por kondusí nan mes riba e kaminda pa e salida di e Marcha.
Marcha ta sali pa 3 or di mèrdia for di Hòfi Abou i ta terminá na e skol banda di e vèlt di Barber kaminda ku tur e bùsnan ta stashoná pa warda e partisipantenan.
Fundashon Karnaval Banda Bou ta deseá hinter pueblo di Kòrsou un Felis Karnaval na Banda Bou selebrando 50 aña.
