Fundashon Kultural Banda Bou ta organisá Rekonosementu i gradisimentu

WILLEMSTAD.- Fundashon Kultural Banda Bou ta den e fasenan final pa selebrashon di DIA DI BANDA BOU dia promé di òktober próksimo.

Djasabra 23 di sèptèmber lo tin e programa di Rekonosementu i Gradisimentu. Riba e anochi aki FKBB ta entregá plaka di mérito na baluartenan di Banda Bou.

Esakinan ta personanan nativo di Banda Bou  ku ta aktivo na Banda Bou òf otro parti di Kòrsou riba e.o. tereno sosial-kultural, deportivo, empresarial, religioso. Kada baluarte por bini ku sinku invitado.

Tambe ta duna un muestra di gradisimentu na personanan ku di un òf otro manera a duna un kontribushon na Banda Bou. E aña aki lo tin diesdos baluarte i tres persona ku no ta di Banda Bou pa gradisimentu.

Djadumingu DIA DI BANDA BOU lo tin su gran dia ku aktividat den kasi tur bario di Banda Bou. Lo tin músika, bendementu di kuminda i hopi mas ku lo keda anunsiá otro siman. Reservá promé di òktober pa Banda Bou.

 

SHARE

LEAVE A REPLY