WILLEMSTAD.- Durante e periodo di 13 te ku 17 di aprel 2026, Fundashon pa Konsumidó a bishitá 15 diferente establesimentu pa anotá preis di un kantidat di 95 produkto den e kategorianan: karni, fruta i bèrdura. E 15 diferente establesimentunan aki ta: Van den Tweel, Arco Iris, Best Buy, Bon Biní, Boulevard market Place, Centrum Mahaai, Centrum Piscadera, Carrefour, Timmy, Esperamos, Mangusa Rio, Mangusá Hypermarket, Ruyterkade, Vreugdenhil i Luna Park. Meta di e anotashon di preis akí ta pa konsientisá i fasilitá nos konsumidónan den nan proseso di kompra. P’esei Fundashon pa Konsumidó ta brinda un lista di preis ku ta duna e konsumidó un mihó bista di kua produkto ta optenibel na unda, kuantu nan ta kosta na kada establesimentu i tambe e diferensianan di preis di kada produkto na e diferente establesimentunan ariba menshoná.
Mangusá Hyper i Mangusá Rio Canario tin mas produkto di karni, belèg, fruta i bèrdura na mihó preis
Di akuerdo ku e lista di anotashon di preis ku Fundashon pa Konsumidó a traha, Mangusá Hypermarket i Mangusá Rio Canario a resultá e supermerkadonan ku mas produkto na mihó preis. A konstatá ku na ámbos supermerkado tatin un kantidat di 34 produkto na mihó preis for di e lista di e 95 produktonan den e makutu pre-selektá.
Esperamos Supermarket a resultá na di dos lugá ku 19 produkto na un preis mas kumbiniente i Vreugdenhil Supermarket a resultá na di tres lugá ku un kantidat di 18 produkto na un mihó preis.
Mangusá Hypermarket i Mangusá Rio Canario e supermerkado mihó surtí!
E supermerkado mihó surtí pa lokual ta trata karni, belèg, fruta i bèrdura a resultá di ta Mangusá Hypermarket i Mangusá Rio Canario. Ámbos establesimentu tabatin un total di 82 produkto for di e 95 produktonan den e makutu pre-selektá.
Bon Biní Supermarket ta na di dos lugá ku 76 produkto i Centrum Mahaai i Centrum Piscadera na di tres lugá ku 69 produkto.
Tin diferensia grandi di preis
Fundashon pa Konsumidó a tuma nota ku tin un diferensia grandi di preis entre sierto produktonan, por ehèmpel 1 kilo di schouderham ta kosta cg 39.99 na Van den Tweel i na Esperamos esaki ta kosta cg 18.75, un diferensia di cg 21.24. Tambe tin diferensia grandi di preis den kategoria di karni. Na Mangusá Rio Canario i Mangusá Hypermarket 1 kilo di Sirloin Steak ta kosta cg 37.90, miéntras esaki ta kosta cg 22.50 pa kilo na Vreugdenhil, un diferensia di cg 15.40.
Fundashon pa Konsumidó ta sugerí pa konsumidónan konsultá e lista di anotashon di preis pa ta na altura di e diferensianan. Ta bon pa menshoná ku e diferensianan di preis akí por ta dependé di diferente faktor, entre otro marka di e produktonan, pais prosedente di importashon i kalidat di e produktonan. Fundashon pa Konsumidó ta partisipá ku no a tene kuenta ku e faktornan aki den e komparashon di preis akí.
Kòrda kontrolá kiko bo tin den kashi promé ku bo traha bo lista di kompra
Esaki ta hopi importante pa evitá ku ta kumpra kos i gasta sèn innesesariamente. Fundashon pa Konsumidó ta invitá tur konsumidó pa subi nos página elektróniko, www.fundashonpakonsumido.cw òf bishitá nos página di Facebook, Fundashon pa Konsumidó, pa tuma nota di e lista di komparashon di preis di karni.
Tambe por hasi un petishon pa risibí e komparashon di preis via nos adrès elektróniko, info@fundashonpakonsumido.cw.
