WILLEMSTAD.- Temporada di Kuaresma i spesialmente den siman santu nos pueblo tin e kustumber di kushiná kuminda di laman. Ta p’esei Fundashon pa Konsumidó ta haña importante pa hasi e anotashon di preis aki i informá e konsumidó na unda ta kumbiní mas pa kumpra.
E anotashon di preis aki a tuma lugá den e periodo di 4 pa 10 di aprel 2025 den koperashon ku Ministerio di Desaroyo Ekonómiko (MEO). E anotashon di preis aki tabata basá riba 107 produkto den e makutu pre selektá di kuaresma. Algun dje produktonan den e makutu pre selektá aki ta: tuna den bleki, sardinchi, diferente sorto di piská, bèrdura na bleki i tambe “paas eieren”.
Pa e anotashon aki Fundashon pa Konsumidó a bishitá 15 establesimentu. Esnan ku a bishitá ta: Arco Iris, Artis, Best Buy, Bon Bini, Boulevard, Carrefour, Centrum Mahaai i Piscadera, Esperamos, Luna Park, Mangusa Rio Canario, Mangusa Hypermarket, New California, Timmy i Vreugdenhill.
Analisando e anotashon di preis, por a tuma nota e diferensia grandi den preisnan di piská. Esaki ta pone ku FpK mester hasi nan mes e pregunta kon leu por mantené e tradishon aki, mirando ku e preisnan di e diferente kumindanan di laman aki ta birando kasi impagabel.
Apesar di e diferensianan grandi den preisnan, manera ya bo a kustumbrá Fundashon pa Konsumidó a saka e tòp 3 di e supermerkadonan mihó surti i e supermerkado ku e mihó preis den e makutu pre selektá. Pa mas informashon di e anotashon di preis di e makutu di Kuaresma, por chèk www.fundashonpakonsumido.cw. Aki por analisá i kompará e preisnan segun bo supermerkadonan faborito i asina traha bo lista di kompra i skohe unda ta kumbiní abo pa kumpra bo kuminda di laman.
E tòp 3 di supermerkadonan mihó surtí na e okashon aki ta:
Bon Bini supermarket ku 80 produkto di e 107 produkto
Centrum Mahaai 72 produkto
Mangusa Hypermarket ku 70 produkto.
E tòp 3 supermerkadonan ku e mihó preis di e makutu pre selektá na e okashon aki ta:
Mangusa Hypermarket ku 25 produkto
Mangusa Rio Canario ku 24 produkto
Bon Bini Supermarket ku 21 produkto
Durante di e komparashon di preis aki no a tene kuenta ku kalidat ni pais di importashon di e produktonan.
