WILLEMSTAD.- Den un karta ku a bai pa Parlamento di Kòrsou e siman aki Fundashon pa Konsumidó ta ekspresá su preokupashon pa ku merkado di bibienda ku ta saliendo kompletamente fo’i balanse. E hende lokal ya no por papia di kasnan pagabel, ni di hür ni pa kumpra. Den su karta e fundashon ta pidi Parlamento i gobièrnu pa laga hasi un investigashon riba e desaroyonan pa loke ta kasnan komo propiedat, preisnan di hür i benta di kas i e influensia di kompra dor di hendenan ku no ta biba aki. Fundashon pa Konsumidó ta kere ku pa medio di esaki lo por haña un bista kuantu ta e kantidat di kasnan ku ta ser usá pa bibienda permanente, pa hür, di dos kas i otro formanan di eksplotashon.
Mas aleu e ta bisa ku nan tin señal di kasnan ku a keda trahá ku sosten di gobièrnu òf via di fondonan di penshun lokal pero ku despues ta ser bendí kontra preisnan relativamente haltu. P’esei Fundashon pa Konsumidó ta pidi tantu gobièrnu komo Parlamento pa atendé e siguiente medidanan i puntonan di investigashon ku alto prioridat:
Modernisashon di e aktual ordenansa di hür i e reglanan a base di kua Huurcommissie ta hasi su trabou, pa asina esaki ta mihó akoplá riba e aktual desaroyonan den komunidat. Mester di mas protekshon pa esnan ku ta hür kas kontra tarifanan muchu haltu. Yega na un sistema transparente pa determiná tarifanan di hür den kual ta konsiderá kriterionan manera e.o. kalidat di kas, alokashon, superfisie i ku e ta pagabel. E influensia di kompra di kas dor di no-residentenan denter di límitenan di lei i teniendo kuenta ku obligashonnan internashonal.
Mas aleu Fundashon ta kere ku den e investigashon mester wak e posibilidatnan pa protehá bibiendanan ku ta traha spesífikamente denter di kapasidat finansiero djesnan ku por paga. Banda di esei Fundashon lo ke sa ta kua te medidanan ku ne momentunan aki ta ser tumá pa promové bibiendanan pagabel, kua medidanan tin kontra spekulashon i benta rápido. Ki medidanan lo por tuma pa garantisá ku generashonnan benidero por tin akseso na kasnan pagabel.
Finalmente e fundashon ta pidi pa pone e problema aki riba e agènda polítiko i eventualmente hiba diálogo ku e entidatnan relevante pa por yega na solushon.
