WILLEMSTAD.- Fundashon Pro Bista Kòrsou ta un di e tres ganadónan di Appeltjes van Oranje 2025. Asina a wòrdu anunsiá djaweps 9 òktober durante entrega di e premionan di Oranje Fonds na Paleis Noordeinde. E fundashon ta e úniko ganadó Karibense.
Reina Máxima, den presensia di ReI Willem-Alexander I Prinsesa Beatrix, a hasi entrega di e Appeltjes na tres organisashon. Tur aña, Oranje Fonds ta premia tres inisiativa sosial ku ta hasi un diferensia den bida di miembronan di nos komunidat. Esaki ta e di 23 edishon di Appeltjes.
Tur aña, Appeltjes van Oranje ta basa riba un otro tema. Pa e aña aki, a skohe e tema: ‘Onmisbare Schakels’. Kada inisiativa ganadó ta risibí un Appeltje di bròns, obra di Prinsesa Beatrix, i un suma di 25.000 euro. E tres inisiativanan ta yuda hende partisipá mihó den komunidat. E otro dos ganadónan ta Stichting Straat Consulaat di Den Haag i Takecarebnb di Amsterdam.
