WASHINGTON, AP.- Dos agente di inteligensia i dos hacker ruso a wòrdu akusá di un robo masivo di dato di Yahoo di por lo ménos 500 mion usuario. Asina Departamento di Hustisia a informá djárason. Esaki ta e promé demanda di su tipo kontra funshonarionan di gobièrnu ruso. E víktimanan di robo tabata kuentanan di e-mail di funshonarionan merikano i ruso, periodistanan ruso, inkluyendo empleadonan di servisio finansiero i otro empresanan. Asina e informantenan a bisa.
“Nos no ta permití pa ningun individual, grupo, estadonan nashonal òf kombinashon di esaki komprometé intimidat di nos siudadanonan òf seguridat di nos pais”, segun supsekretario di Hustisia interino Mary McCord.
Un di esnan akusá, Karim Baratov, ta detené na Canada. Un otro, Alexey Belan, ta riba lista di FBI di siberkriminal mas buská i tin vários akusashon kontra di e na Merka. No ta evidente si e personanan aki ta fugitivo, e akto di akusashon ta identifiká e akusashonnan komo ofisial di Servisio di Seguridat Federal Ruso.
“Mi ta spera nan respetá nos sistema di hustisia penal”, segun McCord.
E kargonan ta relashoná ku un robo di dato kontra Yahoo na aña 2014.
E anunsio ta surgi meimei di medidanan pa investigá e interferensia ruso den e kampaña elektoral resien di Merka. Un di e akusadonan, Belan, tabata entre e rusonan sanshoná aña pasa despues di e hackmentunan aki, ounke funshonarionan merikano a bisa ku ta trata di un otro investigashon.
