WASHINGTON, MERKA, AFP.- E hefenan di Estado Mayor di Merka i Rusia a papia djaweps pa promé biaha na telefòn, den e promé kombersashon direkto desde komienso di e invashon ruso den Ukrania, segun indikashon di Pentágono.
Mark Milley i Valery Gerasimov, generalnan di Merka i Rusia respektivamente, “a papia tokante vários tema preokupante relashoná ku seguridat”, segun indikashon di e bosero di Estado Mayor Konhunto merikano, koronel Dave Butler. Ambos a akordá pa no dibulgá kontenido di e kombersashon.
Ultimo biaha ku nan a kombersá na telefòn tabata riba 11 di febrüari. Nan a papia tokante e plannan di Rusia pa invadí Ukrania, segun Pentágono.
