HONG KONG, AP.- Imágennan di satélite a mustra vehíkulonan blindá i otro vehíkulonan pertenesiente na forsanan paramilitar di China, na un edifisio deportivo na siudat Shenzhen, na otro banda di Hong Kong. Algun persona ta interpretá esaki komo un menasa di Beijing pa usa mas violensia kontra e manifestantenan.

Tres funshonario polisial di Hong Kong a bisa djaweps ku nan no ta na altura di ningun plan indikando ku forsanan chines lo uni e operashonnan na Hong Kong pa para e manifestashonnan masivo riba e teritorio.

E protestanan a kuminsá den yüni i a paralisá diferente parti di e teritorio, inkluyendo e aeropuerto internashonal. Aparte di esaki 700 persona a keda arestá.

E ofisialnan a aseptá pa papia ku un grupo di reportero di prensa estranhero solamente ku kondishon pa keda anónimo.

E funshonarionan polisial a bisa ku e situashon ta “pió ku Occupy Central”, un manifestashon pro-demokrasia di 79 dia na aña 2014. E manifestashonnan a kuminsá pa protestá kontra di un lei di ekstradishon pero ku ya a keda suspendé. E enfoke di e protestanan a kambia kaminda e manifestantenan a kuminsá eksihí mas demokrasia i un investigashon independiente relashoná ku brutalidat polisial. Ningun polis a wòrdu ‘disipliná’ pa uso eksesivo di forsa desde ku e protestanan a kuminsá.

E embahador di China na Reino Uní a bisa djaweps ku Beijing lo no “para man krusá” si e situashon na Hong Kong sigui deteriorá despues di mas di dos luna di manifestashon kasi diario.

LAGA UN KOMENTARIO

Please enter your comment!
Please enter your name here