Loke a keda konkluí durante e di 5 Foro Global di Nikotina
WILLEMSTAD. – Resientemente tabatin e di 5 Foro Global riba Nikotina, ku a tuma lugá na Warsaw Polonia, kaminda ku mas o ménos 600 profeshonal, sientífiko i médikonan a bin huntu di 60 pais rònt mundu pa partisipá i diskutí riba e desaroyo i e revolushon pa loke ta trata uso di nikotina. Korant EXTRA tabata presente na e interesante foro aki ku a hiba e nòmber ‘Rethinking Nicotine’.
Manera ta konosí mundialmente tin un moveshonnan hopi agresivo pa stòp humamentu di sigaria, esaki ya pa hopi aña kaba t’asina.
Durante e foro aki, tabatin penalistanan di tur gremio i tur moveshon, esta e moveshonnan kontra di tabako, esnan ku ta traha lei, kompanianan di tabako ku ta traha duru pa yega na produkto di ménos riesgo, pues hende di diferente “background’ tabata na e foro aki i hopi a trese nan puntonan di bista dilanti.
Tin di e moveshonnan ku ta keda para ariba ku mester stòp uso di tabako, miéntras un kos ta sigur, ku tur hende sa ku humamentu di sigaria ta malu pa salú i esaki ta motibu di e foro nan aki, ku defakto ta tuma lugá rònt mundu, pa riba un base mundial diskutí futuro di tabako i kiko ta e mihó solushon i yega na produktonan di ménos riesgo.
E foro ku a tuma lugá na Polonia tabata bou di e título “Rethinking Nicotine” o sea ‘Rekonsiderá Nikotina.’
Manera ariba menshoná tabata trata di un programa diversifiká di tres dia foro ku ta reflehá e apetit ku awor aki ta eksistí pa analisá e kambionan di métodonan i e patronchi di uso di nikotina huntu ku e desaroyo di siensia.
Na hopi pais e loke ku ta den kaminda ta e legislashon i regulashonnan ku ainda ta inkonsistente, ounke ku siensia ya a demostrá ku tin produktonan di ménos riesgo pa uso di nikotina.
Pero e loke ku tambe a sali na kla for di e foto aki, ta ku polítikonan rònt mundu a kuminsá rekonosé e nifikashon di e produktonan di tabako di ménos riesgo.
Tin un otro aspekto ku ta hunga un ròl, ta e informenan konstante den media rònt mundu ku ta trese duda serka e polítikonan riba e produktonan di ménos riesgo.
Esaki tabata motibu tambe ku e organisadónan di e foro aki, a hinka e programa den otro ku e énfasis pa ‘Rekonsiderá Nikotina’.
E organisadónan a trata mas tantu posibel inkorporá un área hopi amplio pa tur instansia i organisashon por partisipá sea kontra òf pro e desaroyo, pa yega na un diskushon mas amplio posibel.
Den e foro aki tabatin sientífikonan, profeshonalnan riba tereno di salu, legisladónan, konsumidó, fábrika nan ku ta desaroyá produkto di ménos riesgo di tabako, tur a bin huntu pa diskutí e desaroyo aki.
E foro nan aki ta kaminda ku siensia i maneho ta topa ku otro i krea oportunidatnan úniko pa debatí ku mente habrí pa kontribuí na konklushonnan i desishonnan pa yega na produktonan di ménos riesgo.
Tabata un foro eksitoso ku a laga hopi informashon atras pa sigui traha ariba. Konklushon di e foro aki tabata ku futuro liber di huma di sigaria ta riba e bon kaminda.
