Gabinete Rhuggenaath preparando kontestanan pa gobernador

Update: Último ora reakshon di Minister Presidènt

WILLEMSTAD-E informashonnan ku ta sirkulando relashoná ku e trámitenan di gobièrnu pa inkorporá Girobank den e fondo di penshun APC i posibel desishon for di gabinete di gobernador ta motibu di basta preokupashon den komunidat. E informashon ku su ekselensia gobernador lo a tuma desishon pa rechasá e intenshon di gobièrnu i asta blòkia e integrashon di Girobank den APC ta hasi e totalidat ainda mas di preokupashon. Esaki ta duna un impreshon ku sea no tin komunikashon òf e komunikashon no ta esun mas mihó entre e gabinete i gobernador. Riba esaki EXTRA tabatin komunikashon ku Minister Presidènt Eugene Rhuggenaath.

Minister presidènt a kuminsá enfatisá ku tur komunikashon ku gobernador ta konfidensial, pues e no por papia nada di loke ta kombersá ku gobernador. Sinembargo e por a splika si ku debidamente tin komunikashon ku gobernador.

Riba pregunta di EXTRA kon bon e relashon ta si gobernador un bia mas no ta akordá trayekto di gobièrnu, minister presidènt a duna di konosé ku gabinete a deliberá ku gobernador i nan a haña preguntanan adishonal i na e momentunan aki ta preparando e kontestanan konserní. Ta den e proseso gabinete ta na e momentunan aki. Rhuggenaath ta bisa ku no tin desishon di gobernador riba e tópiko aki.

SHARE

LEAVE A REPLY