Preisnan ta basa riba Curoil su fakturanan di novèmber 2018
WILLEMSTAD.- Aña nobo a habri i ku esei ta drenta na vigor e tarifa nobo pa gasolin i diesel ku a baha. Entrante awe tantu gasolin komo diesel a baha di preis na pòmp. Manera Bureau Telecommunicatie & Post a informá gasolin a baha ku 0.11 sèn i gasoil ku 0.14 sèn entrante awe. Pa loke ta trata koriente esaki a baha 0,0357 kilowatt i awa a baha ku 0.1327 meter kúbiko. E bahada di e tarifa final pa e produkto Mogas 95 (gasolin) i Gasoil LSD den yanüari ta resultado di un bahada supstansial di e preis di kompra.
Regularmente tin diskushon den komunidat ora ku tin kambio den e tarifanan di kombustibel, awa i elektrisidat sinembargo ta importante pa keda mustra riba e echo ku ta determiná e preis di kompra, kaminda kalkulashon ta kuminsá, mensualmente pa e luna siguiente a base di Curoil su fakturanan di kompra di e luna anterior. Pues e preisnan di kompra ku ta stipulá pa yanüari, ta basá riba Curoil su fakturanan di kompra di novèmber.
Ta revisá e preisnan di kompra akí dor di notashon di preis internashonal. Ta tene kuenta tambe ku otro gastunan eventual, relashoná ku e kompra, por ehèmpel gastunan di inspekshon. Dor di e lapso di dos (2) luna den e mekanismo pa determiná preis, por ta nesesario pa deskontá eventual diferensia entre e preis di kompra regulá i e montantenan di kompra real, di forma retroaktivo via e elemento ‘Sùrplùs/Défisit’. E klóusula di kombustibel ta konsistí di dos elemento: kompra di koriente i gastunan di kombustibel. E ‘kompra di koriente’ ta basá riba e preis pa e energia ku terseronan ta suministrá, manera energia di bientu, di solo i di CRU. ‘Gastunan di kombustibel’ ta enserá produkshon di energia dor di Aqualectra mes. Sin embargo, kada luna e uso di e diferente medio pa produkshon – e asina yamá ‘meskla di produkshon’ ta varia.
P’esei BT&P ta determiná e balor di e klóusula di kombustibel mensualmente basá riba e pronóstiko di Aqualectra, di kiko e meskla di produkshon lo bira, den e kaso aki pa e luna di yanüari. Si un luna despues resultá ku e elemento akí tabata muchu haltu òf muchu abou, ta korigí esaki. Den e kaso akí, ta trata di e luna di novèmber.
