WILLEMSTAD.-Preis di kombustibel ta bai konosé kambio entrante 31 di desèmber próksimo. Esaki ta konforme e publikashon di Regulatory Authority Curacao (RAC ántes BTP). Den promé bista por nota ku tantu gasolin komo diesel ta baha ku algun sèn.
Manera ta konosí RAC ta informá di e kambionan kada luna. Den e kaso aki e preisnan vigente awor aki ta keda na vigor te 30 di desèmber. E preis pa gasolin ku ta na vigor te 30 di desèmber ta Fl 2.093 pa liter, miéntras ku diesel ta kosta awor aki Fl 1.670 pa liter. E preisnan aki ta kambiando riba bispu di aña nobo.
E preis di gasolin ta bira Fl 2.045 pa liter, pues un bahada di 4.8 sèn riba kaba liter. Diesel ta bira Fl 1.646 pa liter pues 2.4 sèn riba kada liter.
E preis di bòm di gas grandi ta keda 80 florin i e bòter chikí ta keda na 16 florin.
