I nos a siña traha Gelato (no eiskrim). Tabata un eksperensia diferente, den laboratorio serka Patty i Mino na Corriweg na Il Gelato.

Patrizia Castellucchio (Patty) a nase na Kòrsou. Su mama ta yu di Kòrsou. El a bai biba Italia na edat chikí pero awor ta bek na su isla natal huntu ku Giovani Minoia (Mino) kende ta italiano puru, no por a papia ni un palabra papiamentu ora el a bin Kòrsou. Pero awor e ta dominá e papiamentu te e por hiba un kombersashon. Esaki ta realmente integrá den e komunidat di Kòrsou. I nan dos a siña nos di Djasabra kon ta traha Gelato, e proseso for di e básiko te yega na e produkto ku nos ta kumpra i ku hopi bia nos ta yama eiskrim, pero no, e yama Gelato.

Tiki suku, tiki vèt

Patty a splika nos ku nan tin 4 aña ku e negoshi aki Il Gelato.  Patty su mama ta di Kòrsou i tata italiano. El a biba aki te ku 6 aña i despues a bai Italia. 4 aña pasá, Patty ku su kasá a bin habri e negoshi aki. Loke nan tin ta realmente gelato italiano. Nan ta usa produkto fresku, e produktonan ta glutten free. Nan ta usa lechi fresku. E persentual di suku ta 18.2% i 5,3% di vèt ku ta hopi abou. Bibando na Italia nan no tabatin un gelateria. Nan tabatin un kafetaria i a bai skol pa siña traha gelato. E ta algu ku mester siña pasobra ta un trabou adishonal. Tur e materia prima pa traha gelato nan ta kumpra na Italia. Nan a bishita hopi kompania na Italia i despues a skohe kompania Babbi ku nan ta traha kuné. Tur nan produktonan pa traha gelato ta di kalidat haltu segun Patty.

Gelato ku fruta di Kòrsou

Tin un diferensia grandi entre eiskrim i Gelato. E diferensia segun Patty ta ku gelato bo ta den un laboratorio tur dia pa trahe, bo ta pisa i balansa tur produkto ku ta bai den dje pa un sabor. I asina bo tin e gelato fresku tur dia. Nan ta usa fruta fresku. E fruta ta keda meskla ku awa i e krema tin un base ku nan ta traha lechi pasteurisá. Den un mashin ta pone 60 liter di lechi, pa medio di un proseso di 2 ora i mei i ta bai te na 85 grado pa asina mantené e produkto i haña un sterilisashon pa e no daña ni haña bakteria. I asina ta traha tur gelato di krema. Ora kaba ku e proseso nan por kuminsá traha tur sabor ku nan ke.  Nan ta usa diferente produkto di Kòrsou pa traha gelato manera mango, sòrsaka, mespel i asta shimaruku, basta tin. Tambe ta usa parchita, lamunchi di Kòrsou i lamunchi di Sürnam ku nan ta kumpra aki mes na Kòrsou. E frutanan ta keda laborá na man, pasobra tin fruta ku pipita chikí òf otro tin kabei manera e mango i nan tin di kol’é pa asina saka e bon djus di nan. Ta un trabou ku si trahe ku amor, e ta sali ku amor.

Hasi negoshi

 

Hasimentu di negoshi segun Patty ta kanando basta bon. Nan mester a baha drástikamente den e temporada di Lockdown, pero awor kosnan a kuminsá kana bèk. Hasimentu di negoshi ta bai. Nan ta positivo ku negoshi ta kuminsá bèk. Patty a bisa ku ounke nan tin 4 aña situá na Corrieweg anda hopi hende no konosé nan.

 

Banda di Gelato tambe tin kòfi, djus, bolo kuki i tur ku nan mes ta traha, Patty ta traha e buskuchi i bolo italiano. Tambe Patty komo yu di Kòrsou ta traha bolo di Kòrsou mes tambe. E bolo italiano tin ménos suku ku esun di Kòrsou. Patty ta traha bolo di tiramisú presis italiano.

 

Despues di e splikashon di Patty, Mino a duna nos un rekorido kon ta traha 2 tipo di gelato. Tantu di Mango komo tiramisú. I na final nos a sinta saboriá di un capuccino realmente italiano, kuki di almendra, bolo i un ambiente kaluroso ku Il Gelato ta ofresé. I naturalmente nos mester bisa ku despues ku a traha e gelato di mango i di tiramisú nos por a purb’é.

 

LAGA UN KOMENTARIO

Please enter your comment!
Please enter your name here