Algun dje miembronan di Tren de Aragua, kendenan den luna di mart último a keda sentensiá na Chile.
SANTIAGO, Chile (AFP).- Hustisia chileno a kondená na un kastigu di 300 aña di prizòn, entre kua sinku kadena perpetuo, na 12 kriminal ku ta forma parti di Tren de Aragua. Ta trata di un gèn kriminal di orígen venezolano.
Esnan kondená a keda sentensiá pa delitonan manera homisidio, sekuestro i tráfiko di inmigrantenan, den e di dos sentensia mas importante lográ pa outoridatnan na Chile kontra dje gèn akí ku a keda formá den 2014 den e prizòn venezolano di Tocorón.
E fiskal regional di Tarapaca, Trinidad Steinert, a duna di konosé ku e “kondenanan ta na nan lugá”.
Entre esnan kondená tin 11 venezolano i un hòmber ku tin un sédula kolombiano, pero ku ministerio públiko ta kere ku e tambe ta venezolano.
Carlos Gonzalez, alias “Estrella”, konsiderá un dje lidernan di Tren de Aragua den Chile, a keda kondená na bida largu kalifiká, loke ta permiti’é pidi libertat kondishonal despues di 40 aña di prizòn. Su kondena ta pa delitonan di sekuestro, asosiashon ilegal i tráfiko di inmigrantenan.
Hernan Landaeta, alias “Satanás”, i kalifiká komo e prinsipal sikario dje gèn den Chile, Zeus Velásquez, Juan Carlos Blanco i Daniel Azuaje a risibí bida largu simpel. Esei ta enserá ku nan por pidi libertat kondishonal despues di 20 aña será. Sobrá dje gèn a risibí kondenanan entre 2 i 22 aña.
Segun ministerio públiko, durante tratamentu dje kaso di esnan envolví a logra na identifiká sigur 11 kaso di krímen organisá den kua nan a partisipá.
Den mart último, hustisia chileno a kondená otro 34 miembro dje grupo kriminal na kastigunan ku a suma 560 aña di prizòn.
E aktividatnan kriminal di Tren de Aragua a plama den vários pais dje kontinente, entre nan Colombia, Chile i Perú segun informashonnan di inteligensia.
Den febrüari kultismo, e gobièrnu di Donald Trump a designá Tren de Aragua komo un organisashon terorista global i un menasa pa seguridat di Merka.
