Siudadanonan ta yuda patruya polisial keniano ku ta na Haiti, pa kita opstákulonan ku a keda poné den kaminda pa stroba patruyahe den e barionan. E situashon atrobe ta sumamente tenso den e pais karibense.
PORT-AU-PRINCE (AFP).- Un kadena di televishon haitiano a denunsiá di a keda asaltá dos dia despues ku otro dos importante medio di komunikashon dje pais tambe a keda ataká na momento di hopi kaso di violensia den e kapital haitiano.
E kadena Telepluriel a anunsiá riba su wèpsait ku djadumingu mardugá su instalashonnan a keda ataká i a destruí su ekiponan, pa despues sende nan na kandela.
Djaweps anochi tabata e instalashonnan dje stashonnan radial Melodie FM i Radio-Télévision Caraïbes, esun mas bieu dje pais, ku a keda ataká.
Den un komunikado, e Asosiashon Nashonal di Medionan haitiano a bisa di ta “kondená sin reserva e suseso ku ta duna kontinuashon na e káos” den e pais.
Por-Au-Prince atrobe tabata víktima di kantidat di violensia debí na enfrentamentu entre gèngnan armá, ku ademas awor ta ataká vários bario ku no tabata bou di nan kontrol.
