‘Mi no tin karchi di kastigu’
WILLEMSTAD.- Ta awor ku Anthony Godett a bira parlamentario pa partido KEM, e ta presentá den sala di parlamento. “Den último 3 aña i mei ku Godett a traha komo kolaboradó di frakshon di KEM, apénas tabata mir’é den sala di parlamento. Durante tratamentu di presupuesto di pais nunka a mir’é.” kolaboradó di frakshon i èks parlamentario pa Partido Nashonal di Pueblo (PNP), Elvin Gerard ta bisa.
E ta reakshoná riba ponensianan di Godett ku a bisa ku Gerard tin 1 luna sintá na kas ta kobra plaka di pueblo sin ku e ta hasi nada. Gerard for di promé di novèmber a tuma su retiro komo parlamentario pa lider polítiko di PNP pa Ruthmilda Larmonie-Cecilia por drenta parlamento. Tur e ministernan di PNP a entregá nan retiro serka gobernadó despues ku frakshon di MFK den un karta pa direktiva di partido a bisa ku nan no ta dispuesto pa sigui traha huntu ku parlamentarionan Gwedell Mercelina i Sheldry Osepa di PNP.
Gerard ta reta Godett pa laga presidente òf griffier di parlamento saka un relato di tur e biahanan ku Godett a registrá ku su “chip” sea na ofisina di frakshon òf sala di reunion di parlamento. “Si el a bini 2 biaha pa aña ta hopi miéntras ami si ta presente den reunion i tabata risibí públiko na mi ofisina”, Gerard ta bisa.
E ta indiká mas aleu ku ta e otro kolaboradó di frakshon di KEM ta e úniko persona di e frakshon ku ta bini trabou tur dia. “Ni Godett ni èks parlamentario Michelangelo Martines no tabata bini reunion. Martines tabata mas na Repúblika Dominikana ku e tabata na Kòrsou.”
Gerard ta bisa Godett pa no mòrs ku su nòmber pasobra e ta hòmber ku un karchi di kastigu limpi limpi. “Ami no a kai será pasobra mi a mishi ku plaka di pueblo. Tempu Godett tabata diputado el a laga limpia e tereno di Wechi na 2 okashon pa 2 mion florin pa e i su kompinchinan kontratista gosa di plaka di pueblo.”
Gerard ta puntra su mes ta ku ki midí Godett ta midi ora e ta kalumnia kontra otro hende i no ta wak kiko e mes ta hasi. E kolaboradó di frakshon di PNP ta bisa ku ainda Godett ta bringando den komishon di asuntunan doméstiko di parlamento pa nombra Martines komo kolaboradó di frakshon di KEM. “Godett ke pa un hòmber ku ta será kobra plaka di pueblo pa e paga su abogado i kria su famia; ta kiko bo ta hasiendo?”
Finalmente Gerard ta mustra ku e tipo di deklarashonnan aki di Godett no ta nada otro ku weganan shushi ku ta hunga den temporada di kampaña. “Elekshon ta na kaminda i kampaña a kuminsá, pero esei no ta nifiká ku mi ta aseptá kiko ku ta na man di ken ku ta.”
Foto:
…Elvin Gerard…
