Parlamentario pará firme tras di minister Cijntje
WILLEMSTAD.- Bou di niun sirkunstansia ta aseptabel ku e dil ku Refineria di Kòrsou (RdK) a firma ku Global Oil tin komo konsekuensia ku mester subi tarifa di koriente ni tampoko ku ta apliká programa di “schakel” kada 2 ora kaminda barionan ta keda sin koriente.
Parlamentario pa partido Nashonal, Elvin Gerard ta bisa ku e ta para firme tras di minister di Desaroyo Ekonómiko, Ruisandro Cijntje ku ta representante di akshonista den Aqualectra. Gerard ta eksigí pa parlamento haña maske ta “inzage” den e kontrato ku a firma entre RdK i Global Oil kaminda a pasa e instalashonnan di Curaçao Refinery Utilities (CRU) pa Global Oil.
Ta turbinanan di gas pa produkshon di stom i koriente. Aqualectra ku regularidat ta hasi uso di e instalashonnan aki, prinsipalmente den temporada di kalor pasobra e demanda pa koriente ta subi.
Gerard ta mustra ku ta aktualmente den temporada di kalor i no ta aseptabel ku pasobra a pasa e turbinanan den man di un kompania estranhero pueblo mester sufri kalor debí ku no tin sufisiente kapasidat di koriente. Oumento di tarifa tambe e parlamentario ta bisa ku no ta aseptabel, mirando e oumento drástiko den kosto di bida ku tin hopi hende den problema finansiero.
Gerard ta bisa ku mas lihé ku ta posibel mester bini klaridat riba kontenido di e dil ku RdK a sera ku Global Oil. “RdK i promé minister asumí nan responsabilidat i renegoshá e akuerdo ku a yega na dje.”
Ayera anochi tabatin un reunion di partido Nashonal pa hustamente papia riba e situashon ku a surgi aki relashoná ku e dil ku RdK a sera ku Global Oil i konsekuensianan di e dil aki pa Aqualectra i pueblo di Kòrsou.
Curoil
Mas aleu Gerard ta mustra ku tin un diskushon andando den komunidat riba Curoil i kapasidat di e kompania pa hasi e negoshi di meskla di produkto petrolero. E parlamentario ta bisa ku den e diskushon aki tambe mester bini klaridat.
“Por a tende direktor di Curoil den prensa desmentí ponensianan di minister Charles Cooper i splika ku e kompania mes por meskla produkto. Cooper ta kontestá bèk bisando ku Curoil no por hunga den ‘big league’ huntu ku kompanianan manera Oryx Midstream i CPR.”
Ta den e kuadro aki ku Gerard ta eksigí “inzage” den e kontrato ku a sera ku Oryx i tambe e kontrato ku a ofresé Curoil pa meskla i almasená produkto. “Di e forma aki so nos ta haña sa ken ta papia bèrdat den e kaso aki, Curoil òf minister Cooper/RdK.”
Gerard ke sa si loke a ofresé Oryx ta igual ku loke a ofresé Curoil i pa sa si di bèrdat Curoil no por hunga den ‘big league’ manera minister Cooper ta pretendé.
