WILLEMSTAD.- Presidente di Plataforma Bándariba, Elvin Gerard no por a kere loke el a tende na momentu ku el a skucha deklarashonnan di minister enkargá ku Tráfiko, Transporte i Telekomunikashon, Charles Cooper relashoná ku petishonnan pa tereno ku ta pendiente. Segun Gerard e minister a splika ku mester hasi investigashon riba palu genealógiko (“stamboom”) promé ku por duna e terenonan i ku e no ke falta ku lei.
Tin un kantidat grandi di siudadano ta pendiente pa gobièrnu regla e tereno ku nan a traha nan kas riba dje. Djaluna último a tene un reunion atrobe na sede di PNP pa e siudadanonan aki i Gerard ta bisa ku mayoria di esnan ku a asistí ta hendenan di edat avansá. Hendenan ku tin entre 20 pa 30 aña ta warda pa hasi e tereno ku nan a traha nan kas riba dje “erfpacht”.
Gerard ta bisa ku ta algu ku MFK a primintí den kampaña na 2021, esta ku lo bai regla tur e kasonan aki i ku esaki lo trese un suma kuantioso den kaha di gobièrnu tur aña. Ta trata entre otro di personanan ku a traha kas riba un tereno “huurgrond” ku nan tata òf tawela a haña den pasado. “Mi a kasi kai for di mi stul ora mi a tende Cooper bisa ku mester hasi un investigashon riba palu genealógiko di e hendenan aki promé ku por kaba di atendé ku nan petishon.
“Nunka den mi bida mi a yega di tende e kos aki. Bou di niun diputado den pasado manera Nelson Monte, George Hueck, Ephraim Cijntje, òf Tolinchi Pieters tabatin un maneho ku e eksigensia aki.” Gerard ta bisa ku Plataforma Bándariba tambe a organisá na 3 okashon reunion entre siudadanonan i minister Cooper ku a presentá ku su tim di Domeinbeheer pa splika kiko ta hasiendo pa yega na un solushon i e punto aki no a bin dilanti.
“No ta aworakí mi ta lucha pa kaba di regla tereno pa siudadanonan. Ta hopi tempu kaba mi ta luchando i ta kuestioná dikon ta dura largu asina pa kaba di regla e asuntunan aki. Lo mi keda kuestioná sin importá ku ta temporada di kampaña.”
Gerard ta bisa ku vários siudadano indigná a tuma kontakto ku su persona for di ayera mainta despues di a tende e deklarashonnan di e minister na radio. “Mi a tende e minister bisa ku e no ke falta ku lei, pero mi ta puntra mi mes ta kiko ta faya kuné ora ku laga direktor interino di Obranan Públiko kambia konseho pa asina por duna kompinchinan sin ekipo, manera krenwá, skòp, loader, “grader” i wals, kontrato pa asfaltá kaya. Esaki no ta kontra lei?”
E presidente di Plataforma Bándariba ta teme pa e funshonario di Obranan Públiko na momentu ku outoridatnan hasi investigashon di kiko a tuma lugá den e departamento. “Ta burla di lei i benefisiá kompinchinan pa asina haña pida bolo for di nan, pero no por saka tereno pa siudadanonan ku tin 20 pa 30 aña ta warda. Tambe pone preshon pa pasa tereno den área di Kabouterbos pa kompinchi sin duna pueblo tereno”, Gerard ta terminá bisando.
Foto:
…Elvin Gerard…
