WILLEMSTAD.- For di despues di e anunsio ayera mainta ku a pone un moratorio riba Girobank tin basta reakshon ku a surgi. For di mèrdia tempran por a tuma nota ku hopi hende a kuminsá forma fila na pòmpnan di gasolin, apesar ku Curoil a splika bon kla ku no tin niun problema ku suministro di kombustibel. Trahadónan di Refineria Isla i kontratistanan ta reuniendo awor aki den edifisio di PWFC pa determiná kiko ta bira nan siguiente akshonnan.

Informashon ku EXTRA ta disponé di dje ta indiká ku gerensia di Isla a reuní awe mainta ku prome minister i tambe minister di finansa respektivamente Eugene Rhuggenaath i Kenneth Gijsbertha. Mas despues gerensia di Isla a reuní tambe ku e direktor interino di Refineria di Korsou i e direktor ehekutivo di Banko Sentral di Korsou i St.Maarten. Gerensia di Isla a informá su trahadónan ku gobièrnu a instruí Curoil i Aqualectra pa evaluá si por paga e kuentanan ku nan tin habrí na Isla na un manera aselerá. Na di dos lugá a papia riba e echo ku e fondonan di Isla na Girobank ta di vris. Esei ta nifiká ku por lo pronto Isla lo no por disponé di e fondonan ei. Tambe a papia pa Isla i RdK reuní pa yega na un palabrashon nobo pa 2020 ku ta mas den liña ku loke a palabra na Caracas, i ku por keda aseptá pa OFAC. Gerensia a splika trahadónan ku e situashon ta keda difísil pero nan ta hasiendo tur posibel pa na prome lugá garantisá pagonan di desèmber i tambe pa mantené kuponan di trabou den 2020.

Manera indiká kaba Curoil den un informe ofisial ta splika ku no tin motibu pa niun hende pa bai para oranan largu na pòmp di gasolin pasobra no tin problema ku suministro di kombustibel.

 

 

LAGA UN KOMENTARIO

Please enter your comment!
Please enter your name here