BEIJIN (AFP).- Un funshonario haltu di un importante sosiedat estatal chines ta bou di investigashon pa korupshon, segun a keda anunsiá ayera. Xu Zuo, visepresidente di e empresa China Citic Group ta “sospechoso di faltanan disiplinario serio i di a violá lei”, segun e Komishon Sentral di Inspekshon disiplinario di Partido Komunista, sin duna mas detaye.
Citic Group ta un kompania finansiero di estado. Aña pasá su aktivanan total a subi te na 1.5 bion dollar, segun su wèpsait.
Xu, un ekonomista ku eksperensia den atkisishon i restrukturashon den estranhero, ta forma parti dje komité ehekutivo dje empresa for di 2019.
E presidente chines Xi Jinping tin un guera kasi konstante kontra di korupshon for di despues ku el a yega na poder mas di dies aña pasá.
Partidarionan di su kampaña ta bisa ku e ke sigurá un gobernashon limpi, pero su rivalnan ta sostené ku ta un arma ku ta permití pa Xi Jinping eliminá su rivalnan polítiko.
Durante di último lunanan e organismonan anti korupshon chines a konsentrá den sektor finansiero, partikularmente bankonan, kompanianan di seguro i empresanan estatal.
Luna pasá, Bai Tianhui, un tempu direktor general di un kompania grandi di gobièrnu, a keda sentensiá na morto despues ku a hañ’é kulpabel di a rushi mas di 1.100 mion yuan (komo US$150 mion) na soborno.
