Presidente di Ghana, John Dramani Mahama, ta yega na e konferensia Next Step Summit na Akka.
ACCRA, Ghana (AFP).- Ghana den konferensia internashonal ayera a boga pa akshonnan konkreto na e apoyo polítiko kresiente pa reparashonnan di sklabitut. Den luna di mart, Nashonnan Uní a adaptá un resolushon históriko ku a rekonosé ku komersio transatlántiko di katibunan tabata “e krímen di mas grave kontra di humanidat”.
Interfiriendo mediante konferensia di video durante e reunion, e presidente di Fransia, Emmanuel Macron, a insistí ku historia “no por keda redusí na un simpel lógika di referí na loke a pasa”. Na su turno, e presidente ganes, John Mahama, a anunsiá e kreashon di tres grupo di trabou enkargá pa studia e formanan konkreto pa apliká hustisia riba e parti di reparashon. Un dje gruponan ei lo ta enkabesá pa hefenan di estado, otro lo konta ku ekspertonan enkargá pa eksaminá e restitushon i e di tres lo dediká su mes na traha riba aspektonan hurídiko di reparashon.
“E punto ku ta poné nos dilanti no ta pa kambia historia, sino pa mira si nos tin balor pa enfrentá esaki ku honestidat i determinashon pa transformá e rekonosimentu aki den akshonnan konkreto”, segun el a bisa.
E adopshon di un resolushon di Nashonnan Uní a marka e respaldo mas fuerte te ku awe di parti di komunidat internashonal riba e punto di reparashon, ku apoyo di 124 estado miembro di Nashonnan Uní. Entre e partisipantenan na e evento di tres dia ta figurá dirigentenan di Barbados, Sierra Leona, Senegal, Namibia i Liberia, komo tambe e ganadó di Premio Nobel di Literatura di Nigeria i e aktivista di derechinan humano, Wole Soyinka.
