Gianni Webster a studia pa dòkter pero awe e hóben aki ta kanta na Berlin. Na 2008 Gianni a bandoná Kòrsou despues di a kaba ku su estudio na Radulphus College i el a bai Ulanda pa sigui studia. I 10 aña despues e ta na Alemania. Gianni Webster (nòmber artístiko Gianni Mae) a nase i biba na Kòrsou te ku su 18 aña. Semper  ku su estudio na promé lugá terminando VWO na Radulphus College. E la disidí di bai Hulanda pa sigui ku su estudio den Medisina i Komunikashon, apesar di su aspirashon pa ta riba esenario. Na 2006 Gianni a logra bai ku e título grandi di Miss Teenager Curaçao i tambe mayoria otro premio den e sertámen aki. Einan kaba por a mira kon Gianni no tabata tin miedu di subi esenario.  Asina e la kuminsá rèp tambe.

Dòkter mester tin pashon

Gianni Webster  kaba Radulphus VWO i a bai Maastricht pa studia medisina. El a kuminsá studia i a ripara ku e profeshon di dòkter no ta pas kuné komo persona. Pa bo bira dòkter bo mester tin pashon pa e trabou i no ta un dòkter djis pa ta un dòkter. I hopi trempan el a disidí di kaba su Bachelor pero lo no sigui den e estudio ei. I asina tiki tiki el a drenta muzik. Pero teniendo na kuenta ku el a disidí ku e no ta sigui mas aleu ku medisina, el a skohe pa bai den direkshon di komunikashon, marketing i sosial media i esei a sigui pa e hasi muzik full time. Ta un kambio drástiko di un estudio di dòkter pa músika. I awor el a haña su mes. Medisina tabata interesante pa Gianni por a siña di e kurpa. E estudio no tabata laf pero no ta loke e kier a hasi. El a gosa di e estudio ei i ta kontentu di asta a kab’e.

 

Na Alemania

Awor Gianni Mae ta na Alemania. Einan e ta hasi muzik bou di e nòmber Gianni Mae kaminda e ta rep mas tantu i kanta un tiki i e tin un djòp kaminda e ta hasi evento i merkadeo pa un kompania ku ta bende kèts. Su trabou prinsipal ta muzik i e ta bai studio traha kantika nobo, traha video clip i tambe hasi diferente show bibu. Na Oropa den temporada di zomer ta bin masha hopi show i hopi presentashon ku  e tin di hasi. Kasi kada wikènt e ta un kaminda na diferente parti  den Alemania dunando su shownan.

 

Nunka mi a pensa esaki

Honestamente bisa, Gianni nunka a pensa ku e lo ta kaminda e ta awe. Kon esei lo ta hinka den otro e no por a imaginá su mes. For di tempu e tabata yòn e tabata sinti loke e ta hasi ta bon. na 2017 el a bai bishita un amiga na Alemania. Ta un amiga DJ i el a hasi un show na e fiesta einan. Durante di e show el a mira kon ‘leuk’ e públiko a reakshoná i el a sinti pa esaki. Despues el a sera konosí ku algun produktor ku ta traha kantika i nan a traha kantika. Despues el a sigui bai Berlin asina tantu ku el a disidí di bai biba Berlin.

 

Rekonosementu

Su promé rekonosementu internashonal a tuma lugá formando parti di un duo femenina ku ta rèp. Nan a graba i saka kantikanan ku a bira hitnan grandi na radio i ku a haña mas ku 1 mion toka riba Spotify i Youtube. Ku tur e éksito aki, Gianni Mae a disidí di bai biba Berlin na aña 2017 pa e persiguí su soño riba su mes komo un artista solista. Akinan e la konosé Broke Boys, kende ta producernan renombrá na Berlin komo ku nan tabata un di e proménan ku a introdusí e outéntiko Trap muzik den e zonido di HipHop Aleman – produsiendo hitnan fenomenal pa p.e. superstar rèper Aleman Ufo361 kende tin mas ku 10mion views riba Youtube.

Gianni Mae tin un soño pa bin Kòrsou. E ta spera pronto e lo tei pa e duna show. Tur aña e ta bishita Kòrsou kaminda su mayornan, rumannan, tantanan ta biba.

 

Kambia di estudio ta algu normal

Komo studiante ku a kuminsá den un direkshon i despues a kambia bai otro direkshon Gianni a bisa Djasabra ku si e wak su amiganan ku a kuminsá pareu kuné, 50% porshento ta hasiendo loke nan a kuminsá kuné i e otronan a kambia. E ta algu normal pasobra ku 17 i 18 aña bo ta haña bu ta tuma desishon di kiko bo ke bira i bai studia pero ta un desishon pisa pa e edat ei i ta natural ku siendo ta kuminsá un estudio bo por ripara ku no ta algu pa bo. I si ripara mas tempran ku no ta e kos, mas tempran retirá di dje ta mas mihó i bai den e direkshon ku bo ke. E tendensia di kambia ta natural.

 

Mayornan sostené bo yu

I mayornan mester duna nan yunan e chèns i ta habri pa e kambio. Den su kaso ku su 19 aña el a ripara ku medisina no ta algu pe. E tabata un tiki duru pero el a papia ku su mayornan di esei pasobra ta huntu nan a tuma e desishon i e mayornan semper a sostené. Gianni tabata un tiki nèrvioso pa konta su mayornan. Ta masha importante pa mayornan sigui sostené nan yu, den kiko ku nan ke hasi. Mas importante ta pa e persona ta kontentu ku e bida ku e ta kreando pa su mes.

Gianni su presentashonnan ta na diferente siudat na Alemania. E zomer aki e tabatin 10 show di kual vários a pasa kaba i tin mas ta yegando. Despues di e zomer lo e por bai merkadea pafó di Alemania tambe. Por volg Giani riba facebook na Gianni Mae i tambe riba instagram, twitter i por haña asta video clip riba Youtube kaminda den un di nan asta e ta papia un pida na papiamentu. Den lunanan ku ta bai sigui lo tin rèpnan tambe na papiamentu den su kansionnan.

 

Hasi loke bo ke hasi, sea positivo, stima bo mes i no lubidá semper di demostrá ku bo ta yu di Kòrsou.

Un tiki mas di Gianni Webster; orguyoso di ta Yu Di Kòrsou

 

Huntu ku Broke Boys, Gianni a redifini su propio zonido: ku su promé kantika »THEY SAY« kual EARMILK a deskribí di ta : “hard-hitting track for Mae’s authorative lyrics and rousing performance”.  E kantika ta profilá Gianni komo un persona ku hopi energia pero ei mes un elegant Trap Queen. Ku esaki e la keda rekonosé pa medianan internashonal manera COMPLEX, JUICE magazine i mas. E kantika aki ta konta Gianni su historia; persiguiendo su muzik, muda pa diferente estadonan pa traha muzik, konosé i sera konekshonnan ku musikantenan, apesar di dudanan di otro hende. E preshon sosial riba Gianni tabata grandi mirando ku e ta bini for di un isla asina chikitu den Karibe kaminda engeneral ta verwacht di e hóbennan na Kòrsou pa persiguí nan estudio mas riba kareranan akadémiko p.e. abogado, dòkter, accountant. Gianni no kier a sigui e idiologia aki i a disidí di bai pa su metanan grandi.

Apesar ku Gianni Webster a lanta na un pais kayente ku tin solo henter aña, su kantikanan no por zona mas urbano i friu (un bida ku e la integrá kuné bibando den siudatnan grandi). Tur hende ku yega na konosé Gianni lo ripara ku lokual ta hasi su kantikanan interesante ta: e diskrepansia entre su humildat natural den su bida priva i komo artista su konfiansa den su mes i su energia alarmante. Tur dos ta forma parti di Gianni su personalidat.

Resien Gianni Mae a saka su di dos videoclip yama »Killin Em«. E kantika aki tin un intro na papiamentu ku ta enserá algu di su bida i eksperensia personal. Kira Pohl a produsí e video den un aspekto di pelíkula. Inspira pa añanan 60 i 70 ku ta integrá interesantemente ku Gianni Mae su Trap music.

Despues di su debut song »Nov 2018 Gianni a saka 4 kantika mas ku huntu a bira su promé EP titula »Saucy« lansa 24 di May 2019. Entotal 5 kantika  »Nothing’s Free« »Killin Em« »They Say« »M P R« »Kung Fu«

Esaki a ser rekonosé nashonal i internashonalmente den e lastu lunanan aki den revistanan i markanan renombrá manera COMPLEX, i-D, EARMILK, JUICE magazine,Nike, Vogue Germany (kual a hasi un entrevista eksklusivo ku Gianni) i mas. Gianni Mae su muzik i presentashon riba esenario no ta simplemente un mensahe komun femenista; e ta transformá clichénan konservatorio i ròlnan entre sekso maskulino i femenino; i para simbólikamente pa empoderamentu femenina. Pues Gianni Mae ta para fuerte pa e generashon nobo di MC femenina kombinando esaki ku “self-empowerment, coolness i skills.”

Huntu ku e netwerk fuerte ku Gianni ta serando na Berlin, ya e la logra hopi. Entre otro diferente “live shows” riba esenarionan grandi prinsipalmente den e temporada di festival 2019:  C/O Pop Festival, Puls Open Air, Splash! Festival, Fusion Festival i hopi mas.

Tumando nota ku Gianni Mae ta un artista independiente hasiendo tur kos riba su mes sin niun record label, ya e tin planes pa sigui saka muzik i inkorporando mas di su Isla den esaki tambe.

Gianni ta hopi orguyoso di ta un Yu di Kòrsou, por mira esaki den su kantikanan, entrevistanan i tambe un kadena di Kòrsou ku e ta bisti pa asina sin mester papia, tur hende por mira ku e ta di un pais chikí den Karibe pero ku soñonan hopi grandi.

 

LAGA UN KOMENTARIO

Please enter your comment!
Please enter your name here