WILLEMSTAD.- Gilbert ‘Gibi’ Bacilio di Plataforma Sklabitut i Herensia di Sklabitut tabata hopi sorprendí ku e anunsio ku Hulanda lo pidi despensa pa pasado di sklabitut. Hulanda djabièrnè último a bisa ku lo pidi pordon riba dia 19 di desèmber e aña aki. Segun gobièrnu hulandes e dia ei, riba kada isla di parti Karibense di Reino Hulandes i tambe na Sürnam, lo tin mandatario hulandes presente pa duna un spich.
Bacilio pa basta aña ta papia ku Hulanda tokante herensia di sklabitut. Segun Bacilio pa mas ku dos aña kaba Kòrsou, huntu ku e otro islanan Karibense di Reino Hulandes, a kana un trayekto. Durante diferente reunion den e último dos aña kada pais a trese dilanti rekomendashon ‘kon por bai remediá daño hasí ku e krímen kontra humanidat’. Pa e paisnan Karibense, i tambe Sürnam, ta hopi importante e kontenido di e ekspreshon di pordon. “E notisia ku awor Hulanda lo bin ku un ekspreshon di diskulpa a kai straño. E ta nifiká ku lokual nos a pidi den tur momento di kontakto den e último dos aña, Hulanda no a tene kuenta kuné. Nos a pidi pa tuma tempu pa skucha kiko ta biba na kada entidat i pais. I pa hinka esei den e teksto di e deklarashon. Pa asina e por bira un deklarashon inklusivo. Lamentablemente Hulanda no a tene kuenta ku e rekomendashonnan ei.”
Bacilio ta kontentu ku gobernantenan dia 19 di desèmber lo biaha na Kòrsou, Aruba, St. Maarten, Boneiru, St. Eustatius, Saba i Sürnam, pa hasi e anunsio riba e dia ei. Minister-presidente Rutte mes lo hasi e anunsio na Hulanda. “Nos ta masha kontentu ku e no ta tuma lugá na Hulanda so”, Bacilia ta bisa: “Tin alegria pa e desishon ku Hulanda lo pidi pa despensa. Pero e proseso por a kana otro.”
Sürnam
Den e wikènt último komishon di Reparashon na Sürnam a duna di konosé ku nan no ta di akuerdo ku e trayekto ku Hulanda ta kana pa pidi despensa pa pasado di sklabitut. Segun nan, dia 19 di desèmber ta muchu lihé. Si Hulanda no ta kambia esaki, Sürnam ta laga e posibilidat habri pa no aseptá despensa.
Bacilio ta komprendé e punto di Sürnam. Pero ta splika ku Kòrsou lo no bai asina leu. “Mi no ta sinti ku nos lo no aseptá e despensa.”
Na mesun momento el a komprendé for di sekretario di estado di Relashonnan di Reino Alexandra van Huffelen ke te ainda e teksto di e diskulpa no ta kla. “Nan ta skibiendo.” Van Huffelen a bisa ku entidat i paisnan Karibense por manda aporte. Van Huffelen a bisa ku lo tene kuenta na esei.
Bacilio: “Esaki ta nifiká ku Hulanda ta laga e posibilidat habri pa pais i entidatnan di parti Karibense di Hulanda por kontribuí na e teksto. Na mi opinion e ta nèchi di e sekretario di estado. Pa laga un porta habri pa tur e seis isla i Sürnam pa manda un aporte. Mi ta aploudí esaki.”
Den mesun rosea e ta bisa ku e komishon miksto (pa deliberá tokante e teksto di e despensa) ku nos a pidi ‘lo tabata mas bunita, mas profundo i mas aseptabel.’ “Pero nos no ta bisa no pa 19 di desèmber awor.”
