WILLEMSTAD.- Direktor di Curaçao Medical Center (CMC) Gilbert Martina djaweps último durante rueda di prens a splika ku situashon ku COVID-19 tabatin un impakto sumamente grandi riba kuido regular di CMC. E tabatin un impakto sumamente grandi riba kuido hospitalario. Martina a splika ku: ‘Tur nos abitantenan ku ta bin na nos hospital mester haña kuido.’ Na su opinion den lunanan di mart, aprel i mei di e aña aki e kuido normal a wòrdu praktikamente paralisá. ‘Komo konsekuensia di esaki por mira ku na momentu ku COVID-19 a pasa i ta buta atenshon na kuido normal tin un lista di espera basta grandi ku tin ku wòrdu tratá.’
Martina a bisa ku krísis di COVID-19 tabatin un impakto grandi riba personal. Den total 217 persona ku ta traha den CMC a wòrdu infektá. Martina a splika ku tur personal a rekuperá.
Komo konsekuensia di e kantidat haltu di trahadónan ku e keda infektá, CMC mester a sera diferente departamento. Manera departamento di kushina i di limpiesa. ‘Danki na esfuersonan di komunidat nos a haña hopi yudansa pa nos por a sigui drai e departamentonan aki.’
Martina tambe a splika ku CMC a haña hopi yudansa lokal i internashonal. Segun Martina CMC ta hopi gradesido. Martina: ‘Awor tur personal ta bèk na trabou.’ Pero segun e direktor te ainda tin algun di nan ku no ta 100 porshento.
Martina a bisa durante rueda di prensa ku bou di e personal 922 persona a vakuná. Na su opinion esaki ta algu hopi positivo ‘Nos por ta hopi orguyoso di dje.’ CMC tin alrededor 1270 empleado. Segun Martina e ta nifiká praktikamente ku kasi 85 porshento di tur trahadónan di CMC ta vakuná. Ku ta nifiká ku nos lo no tin un brote mas aki den CMC.’
Martina a splika ku te ainda tin algun empleado ku no a vakuná. ‘Nos lo sigui motivá nan pa tuma nan vakunashon.’
