WILLEMSTAD.- Tin un kantidat inkreiblemente grandi di petishon pa pèrmit di molèster wantá na departamento di Medio Ambiente. Banda di esaki tin hopi reklamo di siudadanonan ku e mesun departamento akí no ta atendé nan kehonan for di komunidat. Eks kolaboradó di minister pa PNP, Norman ‘Nooi’ Girigorie, ta bisa ku e informashonnan ku e mes ta disponé di dje ta indiká di un situashon ku simplemente no por.
“Mi ta hañando masha hopi keho di hendenan ku ta aserká mi ku pregunta dikon no ta atendé ku nan keho. Ami ta un hende di tur hende pues, mi ta hasi esfuerso pa yuda tur ku aserká mi pero den e kasonan akí mi tambe ta konstatá ku kosnan ta mal pegá, Girigorie ta deklará pa EXTRA. E ta splika ku siudadanonan ta bisa ku ta keda yama e departamento dianan tras di otro na e number 5252587 pero sin resultado.
“Dia ku finalmente nan haña konekshon i duna nan keho, tòg ta keda sin atendé esaki. Niun hende ta bin wak e keho. Mi mes tambe a purba yama e departamento pero no ta logra drenta den kontakto ku un funshonario.”
Un di e kehonan ku segun Girigorie hopi siudadano tin, ta outonan bieu pará hopi tempu riba kaya públiko banda di nan kas. “Esaki ta kousa di plaga di djaka i otro insekto. Tambe tin keho di awa sushi ku ta kore dilanti nan porta di kas i manda holó stinki, kantidat di sushi ku ta dùmp banda di nan kas, holó di kimamentu di sushi, etc.”
Ta niun di e kehonan akí e departamento konserní no ta atendé, Girigorie ta sigui bisa. Esaki pa su persona ta inkomprendibel pasobra mas òf ménos 2 aña pasá a buska diferente trahadó i tambe medionan di transporte nobo pa un tim spesial por atendé ku e kehonan akí. “Mi ta puntra mi mes ta kiko ta pasando na e departamento akí pasobra te ku algun aña pasá e asina yamá X-Team tabata basta aktivo pa atendé netamente ku e tipo di kehonan akí.”
Mas aleu Girigorie ta bisa ku e ta na altura di un otro kaso kaminda un siudadano ta kumpra korant tur dia pa wak ki dia ta publiká petishon pa pèrmit di molèster pa un negoshi ku a kaba di habri serka di su kas. “E persona akí tin molèster di e negoshi i ke entregá un opheshon. El a bisa mi ku el a nota ku pa algun luna kaba no tin publikashon di petishonnan pa pèrmit di molèster miéntras ku e sa ku e negoshi banda di su kas a hasi un petishon.”
Abase di investigashon mas aleu ku Girigorie a hasi e ta bisa ku el a komprendé ku ta kantidat inkreiblemente grandi di petishon pa pèrmit tin wantá na departamento di Medio Ambiente.
Foto:
…Norman ‘Nooi’ Girigorie…
