WILLEMSTAD – Ministerio di Salubridat, Medio Ambiente i Naturalesa (GMN) ta bati alarmá despues ku den último periodo a haña seis warawara morto, entre nan tres warawara chikí, komo konsekuensia di uso di venenu.
E situashon a pone GMN saka un alerta pa e konsekuensianan ku uso eksesivo di venenu por tin konsekuensia serio pa flora i fauna di Kòrsou. Ministerio ta hasi un yamada urgente na komunidat pa no usa venenu pa trata di eliminá kachó brabu òf otro animalnan ku ta kousa problema.
GMN ta komprondé ku tin situashonnan kaminda kachó ku ta kana sin doño por kousa daño na krio di bestia, propiedat òf otro animalnan. Sinembargo, venenu ta un método sumamente peligroso ku por tin konsekuensia serio i hopi biaha ireversibel pa naturalesa.
Venenu no ta skohe su víktima
E seis warawaranan morto ta prueba di e peliger, ya ku venenu no ta traha selektivo. Banda di paranan yagdó, otro animalnan di mondi i animalnan doméstiko tambe por bira víktima.
E venenu por sigui plama via kadena alimentisio. Un animal ku kome e venenu por muri, pero despues un warawara òf otro animal por kome e animal venená i tambe keda afektá. Asina por kuminsá un reakshon den kadena ku ta pone vários espesie na peliger.
Ademas, GMN ta atvertí ku venenu por forma un riesgo direkto pa hende. E supstansia por kontaminá medio ambiente i bira un peliger pa mucha, adulto i animalnan doméstiko ku drenta den kontakto kuné.
No usa venenu kontra kachó salbahe
GMN ta pidi personanan ku ta eksperensiá problema ku kachó brabu òf kachó di mondi, spesialmente ora nan ta ataká krio di bestia, pa no usa venenu. En bes di esei, nan mester reportá e situashon na e instansianan kompetente pa por evaluá e kaso i buska un solushon adekuá.
Ministerio ta enfatisá ku protekshon di naturalesa ta responsabilidat di tur hende. Kada animal tin su funshon den ekosistema i uzo iresponsabel di venenu por kousa daño ku ta yega hopi mas aleu ku e problema ku originalmente tabata tratando di solushoná.
GMN ta pidi komunidat enfátikamente pa no usa, laga atras òf pone venenu na lugánan kaminda hende òf otro animal por alkans’é.
