Akshon di protesta ayera den Washington, kontra di presensia di Guardia Nashon al. Presidente Donald Trump ta menasá di lo pone polis militar den estadonan ku ta bou kontròl di gobernadornan demokrat.
CHICAGO (AFP).- E intenshon di gobièrnu di Donald Trump pa manda tropanan den siudat di Chicago, bisando ku ta pa kombatí delinkuensia, ta representá un “invashon”, segun e gobernador di estado di Illinois, JB Pritzker. E dirigente demokrat, kende ta profilá komo un dje prinsipal opositornan di Trump, tambe a akusá e magnate, kende el a yama un “diktador”, di ke “tuma kontròl” di elekshonnan legislativo na mitar di su mandato di novèmber 2026.
Despues di Los Angeles den yüni, i Washington, for di medio ougùstùs, Chicago ta surgi komo e esenario nobo dje despliegue di polisnan federal i forsanan militar anunsiá pa Trump. Despues lo kontinuá ku New York, Baltimore i Boston.
Tur e siudatnan menshoná ta goberná pa demokratnan. Referiendo na e delinkuensia den Chicago, Trump a ataká e “débil gobernador di Illinois”, manera el a referí na Pritzker.
“E ta bisa di no tin mester di yudansa pa para e delinkuensia. E ta loko! “Ta mihó e atendé asuntu akí i lihé”, segun Trump a skirbi djasabra anochi riba Truth Social.
“Ningun hende den gobièrnu, ni e presidente, ni ningun hende bou di su outoridat, a yama ami ni ningun hende di mi atministrashon, na e siudat di Chicago”, segun Pritzker, kende meskos ku e otro 49 gobernadornan di estado, tin outoridat riba Guardia Nashonal stashoná na Illinois.
“Ta bon kla ku e ta planiando, den sekreto, un invashon ku tropanan”, di akuerdo ku Pritzker, kende a agregá di lo tuma akshonnan legal si e personal militar ei keda desplegá.
