PARIS, AP.- E promé minister franses a bisa djárason ku e edat di retiro lo oumentá pa esnan mas hóben, pero a ofresé un serie di konseshon pa purba para un protesta nashonal kontra un reforma di penshun. Opositornan ta argumentá ku e reforma aki lo afektá estilo di bida den e pais.
E gobièrnu kier a purba hasi e sistema di penshun mas simpel, pero ta enfrentá preshon fuerte di parti e pueblo, ku a inkluí diferente wèlga di transporte ku ta durando un siman kaba. Sindikatonan prinsipal a rechasá e proposishonnan i a primintí ku lo sigui ku e wèlga.
Mas di 300.000 persona a manifestá den e pais kompleto kousando filanan largu riba kaya i avenidanan di Paris ku un promedio di 460 kilometer di fila. Solamente dos liña di metro a operá i mayoria trein no tabata kore. E sindikatonan ta akusá presidente Emmanuel Macron di goberná solamente na fabor di esnan riku.
Esnan ku a nase despues di 1974 lo mester traha te ku 64 aña di edat pa kobra e suma kompleto di penshun. E edat máksimo aktual ta 62 aña. Esnan ku a nase promé ku 1974 lo no wòrdu afektá pa e reforma.
