NAXXAR, MALTA, AFP.- Malta su promé minister Robert Abela a primintí ‘mas humildat’ djadumingu na momentu ku su Partido Laborista a gana un terser mandato den gobièrnu, despues di elekshonnan parlamentario.
Ounke resultadonan ofisial lo drenta te djaluna mardugá, e laboristanan a bisa ku a haña mayoria voto basá riba resultadonan preliminar. E partido opositor Partido Nashonalista a konfirmá esaki.
Abela a hasi kampaña riba su maneho di e pandemia di corona vírus i tambe e pasado ekonómiko di Partido Laborista ku a keda nuebe aña na poder.
Partido Laborista su imágen a wòrdu kontaminá pa korupshon di nivel haltu eksponé pa e periodista Daphne Caruana Galizia, asesiná den un atake ku bòm den òktober di 2017, un asesinato ku a shòk mundu kompleto.
Un investigashon di aña pasa a determiná ku e èks promé minister di Laborista, Joseph Muscat, a krea un “kultura di inmunidat” pa enemigunan di Daphne.
