MANAGUA, AP.- E gobièrnu di Nicaragua a emití 100 òrdu di liberashon pa personanan detené durante protestanan kontra e gobièrnu di Daniel Ortega un ora despues ku e partido Aliansa Síviko a anunsiá su salida di e negosiashonnan si no liberá tur “prezu polítiko”.
E ministerio di gobernashon a aklará ku ningun di e personanan lo tin libertat definitivo.
Un aktivista di derechi humano a bisa ku vários persona a haña yamada di outoridat konfirmando e liberashon di nan famianan.
E polítiko Jose Pallais, un di e negoshadónan prinsipal di Aliansa Síviko, a bisa ku e liberashon ta “un gesto positivo di gobièrnu, pero e no ta sufisiente” pa kontinuá ku e negosiashonnan kaminda gobièrnu i oposishon ta purba pone fin na mas di un aña di krísis polítiko ku a kosta mas di 300 morto.
Esaki ta e di kuater liberashon di Ortega su gobièrnu for di febrüari i ounke e Komité Internashonal di Krus Kora lo media den e proseso aki, tur liberashon a wòrdu hasí di forma unilateral, kual a generá konfushon tokante e kantidat di personanan ku ainda ta detené.
E diálogo tin vários dia stanká. I e situashon a bira mas tenso despues ku un prezu opositor, Eddy Montes, a muri.
