OTTAWA, CANADA (AFP).- E gobièrnu di promé minister kanades, Justin Trudeau, a sobrebibí un moshon nobo di sensura den parlamento, e di dos den poko dia, promové pa su prinsipal rival konservador.
E votashon (207 kontra 121) ta práktikamente meskos ku esun di siman pasá, ora ku e konservadornan a promové otro moshon kontra dje gobièrnu den parlamento, pa logra ku ta konvoká elekshon mas trempan.
E konservadornan ta akusá e gobièrnu di frakasá den su enfrentamentu dje krísis di bibienda, e oumento di delinkuensia i kosto di bida, i di ta “e gobièrnu mas sentralisador di historia kanades”.
E lider konservador Pierre Poilievre a bin ta insistí pa elekshon mas trempan for di despues ku e partido NDP, di iskierda, a kibra un akuerdo luna pasá ku e liberalnan di Trudeau, loke ta laga e gobièrnu den un posishon vulnerabel.
Pero NDP i otro partidonan di oposishon, di kua nan apoyo ta nesesario pa por tumba e liberalnan, a rechasá su agènda di “derecha”. Pero asina mes, Poilievre a primintí di sigui purba.
