E isla di Groenland ku ta hopi deseá pa Donald Trump pa motibu di rekursonan natural presente. E isla ta kai bou di Dinamarka.
PITUFUK, Dinamarka (AFP).- E vise presidente di Merka, JD Vance, ayera a akusá Dinamarka di no ta hasi sufisiente pa protehá Groenland. El a hasi esaki durante di su bishita na e teritorio danes, situá stratégikamente i riku na rekursonan, i ku ta hopi gustá pa e presidente Donald Trump.
E bishita di JD Vance na e base norteamerikano di Pitufik, na e kosta nortwèst di Groenland, den kompania di su kasá Usha Vance, dje konsehero di seguridat nashonal Mike Waltz i minister di energia Chris Wright, a keda konsiderá komo un provokashon na e isla ártiko i Dinamarka.
“Dinamarka no a hasi un bon trabou pa garantisá e seguridat di Groenland”, JD Vance a bisa na tropanan norteamerikano na e base militar di Merka riba e isla.
“No a invertí sufisiente den e poblashon dje isla i den seguridat dje inkreibel i bunita masa kontinental di hende masha dushi mes. E kos aki mester kambia”, el a agregá.
Despues di su krítika kontra di Dinamarka, e vise presidente a remarká di no ta kere ku “forsa militar” ta nesesario pa alkansá nan metanan ku e teritorio.
“Nos ta kere ku e abitantenan di Groenland ta rashonal i ku nos lo yega na un akuerdo estilo Donald Trump pa garantisá seguridat dje teritorio i tambe di Merka”, segun el a duna di konosé.
Miéntras tantu, den White House, e presidente Trump a insistí den su plan pa kontrolá Groenland. “Esaki ta hopi importante pa seguridat internashonal. Nos mester tin Groenland”, segun Trump a bisa.
“No ta na benta”
Groenland ta un isla grandi kubrí pa 80% ku eis i ku ta konta ku rekursonan mineral importante pa transishon energétiko. Di su 57.000 abitante, kasi 90% ta dje isla mes.
E teritorio tin outonomia den Dinamarka, ku ta karga responsabilidat pa diplomasia, defensa i polítika monetario i ta suministrá un yudansa anual ku ta representá e 20% di PIB dje isla.
“Merka sa ku Groenland no ta na benta. Nan sa ku Groenland no ke forma parti di Merka. A bisa nan esei, tantu di forma direkto komo den hubileo”, segun Mette Frederiksen, promé minister danés..
Gran parti dje poblashon i tur e partidonan polítiko ta promové independensia dje teritorio i praktikamente tur ta rechasá e idea pa forma parti di Merka.
