WILLEMSTAD.- Gobièrnu i Parlamento di Kòrsou mester sosten’é i promové desaroyo di un Vishon Nashonal di Futbòl 2026–2040 di manera aktivo komo parti di un agènda nashonal mas amplio pa desaroyo sosial, salú, enseñansa i kresementu ekonómiko. Esaki di akuerdo ku eks gezaghebber i promé minister Stanley Betrian.
“Historia ta siña nos ku logro grandi asina masha poko bes ta surgi pa kasualidat. Tras di tur éksito duradero tin un vishon di largu plaso. Esaki ta konta pa paisnan, empresanan i organisashonnan deportivo, i ku muchu mas rason e mester konta pa gobièrnunan i Parlamentonan aktual i benidero.”
Pa e motibu aki Betrian ta puntra pakiko esei lo ta diferente pa Kòrsou. “Den pasado, nos a desaroyá diferente vishon nashonal pa duna direkshon na nos futuro. Lamentablemente no a ankra hopi di nan sufisientemente den nos institushonnan. Pa e motibu ei, nan ta disparsé for di bista asina ku sirkunstansianan polítiko a kambia.”
E proyekto di Kampeonato Mundial ku ta tumando lugá na Merka, Canada i México, na opinion di Betrian, ta ofresé un oportunidat úniko pa no ripití e eror ei. “Pa promé biaha, nos tin un meta ku kasi tur yu di Kòrsou ta komprondé, sin importá konvikshon polítiko, edat òf posishon sosial. Un meta ku ta inspirá. Un meta ku ta uni. Un meta ku ta mustra kiko ta bira posibel ora un pueblo disidí di traha huntu.”
Podisé p’esei, Betrian ta sigui bisa, e pregunta di mas importante no ta si Kòrsou por kalifiká pa un Kampeonato Mundial. “Sino e pregunta hopi mas importante ta, si nos ta kapas pa hasi di e ambishon ei un proyekto nashonal. Pasobra ,ora nos logra apliká e mesun disipliná, koperashon i determinashon ku ta nesesario pa yega na Kampeonato Mundial tambe riba nos desaroyo sosial, anto finalmente nos ta gana muchu mas ku un partido di futbòl.”
Finalmente Betrian ta enfatisá: “Paso e ora ei nos ta gana algu ku pa tur nashon tin balor inkalkulabel ku ta un futuro komun. Un Mundial, un pueblo, un soño.” Pa Betrian por konsiderá e echo ku Kòrsou logra klasifiká pa un Kampeonato Mundial di FIFA, sin duda komo e logro deportivo di mas grandi den nos historia. Pero, E èks gezaghebber i èks promé minister ta konvensí ku no mester laga nifikashon di un logro asina keda riba e kancha di futbòl so. E mester haña un lugá den nos ambishonnan relashoná ku desaroyonan general di futuro di Kòrsou komo komunidat.
