WILLEMSTAD.- Gobièrnu di Kòrsou tin intenshon pa nombra un supervisor fiho pa Klein Kòrsou. Den e nota di finansa riba e konsepto di presupuesto 2027 ta indiká ku e supervisor akí mester ta responsabel pa e maneho diario, supervishon i mantenshon di órden riba e isla. Den e konsepto di presupuesto ta pone bastante atenshon riba desaroyo di Klein Kòrsou. Gabinete Pisas III ta indiká entre otro ku e intenshon ta pa duna ehekushon na e plan di desaroyo pa Klein Kòrsou. E plan akí ta pone énfasis riba mantenshon, rekuperashon i protekshon duradero di e naturalesa úniko i balornan kultural históriko di e isla.
Na mes momentu ta trata di yega na un balansa entre mantenshon di naturalesa, uso rekreativo, aktividatnan turístiko i desaroyo ekonómiko limitá pa asina mantené e balornan di naturalesa i ekológiko di Klein Kòrsou pa futuro generashonnan. Ta den e kuadro aki, ku ta menshoná den e konsepto di presupuesto 2027, ku ta e intenshon pa nombra un supervisor fiho pa e isla. Banda di esaki, gobièrnu tin e intenshon pa realisá kontròl struktural i balornan di naturalesa, biodiversidat i sistemanan ekológiko, i alabes kombatí i kontrolá espesienan invasivo manera djaka ku ta forma un peliger pa e sistema ekológiko di e isla.
Mas aleu, ta pone atenshon den e konsepto di presupuesto riba konstrukshon, mehorashon i mantenshon di e infrastruktura nesesario i otro instalashonnan ku ta kontribuí na un uso sigur i duradero di e isla, di parti di e bishitantenan. Den esaki ta tene kuenta ku loke e isla por karga kuné i protekshon di balornan vulnerabel di naturalesa. Tambe lo instalá mas bui pa asina minimalisá daño na koral i konsekuentemente protehá e biodiversidat marítimo ku por sufri daño debí na uso di anker.
E plan di desaroyo pa Klein Kòrsou ta pone atenshon mas aleu riba medidanan pa un turismo di naturalesa duradero, edukashon riba naturalesa, i konsientisashon di esnan ku ta bishitá e isla ku nan por disfrutá di e bunitesa natural di Klein Kòrsou sin ku ta okashoná daño na su integridat ekológiko. Punto di salida ta ku e aktividatnan turístiko ta tuma lugá solamente den kuadronan duradero bon definí ku ta kontribuí na mantenshon, maneho, i ku ta fortifiká e balornan natural ku ta hasi Klein Kòrsou un di e áreanan di naturalesa mas spesial di Kòrsou.
Dam Pretu
Tambe gobièrnu ta pone atenshon pa e situashon na Dam Pretu. Ta pone medionan finansiero disponibel pa kontinuá ku vigilansia di e área. Esaki ta nesesario pa mantené kontròl riba e problemátika di dùmpmentu ilegal di shushi i kandelanan den e área. Pa medio di vigilansia struktural ta kontribuí na protekshon di e habitat, seguridat públiko i ta minimalisá molèster pa medio ambiente.
