Sr. Edward St Jacobs presidente di SSK na konmemorashon Dia di Labor
WILLEMSTAD.- Dia di Labor, 1 di mei, SSK i CGTC a konmemorá Dia di labor di un forma sobrio.
Den Misa di Sta Familia, presidente di sentral sindikal sr. Edward St Jacobs a bisa ku ta di dos aña konsekutivo ku sindikalismo ta obligá di honra promé (1e) di mei dia internashonal di labor na un manera otro ku añanan anterior.
E motibu pa desviá di normalidat, kustumber no ta simplemente pa kumpli ku òrdu di outoridatnan so. Banda di respetá lei i òrdu di pais, Sindikalismo ta promové siguridat di komunidat, ta deber di kuida salu i otro, inkluso salu di bishitantenan di nos isla.
Esaki ta muestra di kompañerismo, sivismo i patriotismo ku sindikalismo mester para pe, saliendo na defensa i bienestar di trahadó i nan famia, komunidat en general.
Sindikalismo ta boga pa progreso di Kòrsou riba tur tereno di bida.
Salu públiko semper ta i lo keda foko di atenshon pa sindikalismo. Sigur awor ku pais ta konfrontando un krísis ku a afektá mundu henter di salu ku su impakto sin piedat riba tur sektor i área di komunidat. Sindikalismo no por pèrdè for di bista obligashon, konvikshon i determinashon pa lucha ku seriedat kontra di un enemigu di humanidat ku no ta hasi wega.
Nifikashon i esensia di dia di labor ta di balor inmenso i profundo pa sindikalismo.
Sindikalismo ta reflekshoná riba esfuerso ku kada persona den komunidat ta hasi pa mantené i sostené bida familiar. Tambe nan ta kere ku ta bon pa koregí e idea eróneo ku ta biba serka algun hende. “No ta ora nos ta okupá puesto polítiko si nos por sirbi nos pais, ta den tur trabou permití pa lei, pa humilde ku enkargo por parse nos por sirbi nos pais”.
Den kuadro aki sindikalismo ta ekstendé palabra nan di mérito pa mamanan di kas ku ta hasi esfuerso tur dia na bienestar di nan famia.
Mas aleu sr. St. Jacobs a bisa ku awe mas ku nunka Kòrsou mester realisá ku trahadó i dunadó di trabou mester di otro i fasilidat di gobièrnu pa sobreviví, gobièrnu tambe ta dependé di éksito di tur dos parti por funshoná.
Ademas gobièrnu tin ku krea balansa hustu entre di trahadó i dunadó di trabou respetando i rekonosé responsabilidatnan di gobièrnu. Aki no por keda sin menshoná e falta di rèspèt ku sindikalismo a eksperensia serka gobièrnu dor di no rekonosé sindikalismo komo un funshon vital den e temporada di “lock down” aki.
Sindikalismo ta sigui kere den diálogo struktura i real pa sosionan den komunidat, buska solushon pa problemanan grandi di pais inkluso kon atendé relashon ku reino.
Pa sindikalismo esaki ta nifiká futuro di trahadó ku mester probechá di oportunidat ku kualkier avanse teknológiko ta trese. Sindikalismo no ta kansa di bisa ku nos hendenan mester haña oportunidat pa desaroyá i práktika nan talentonan pa hiba un bida familiar desente, ku ta enserá ora pa trabou, ora pa rekreá i ora pa deskansá.
Historia ta ripití, trahamentu na kas, for di kas na distansia òf bou di kualkier nòmber sofistiká ta birando praktikamente na moda. Gobièrnu mester reglamentá e tendensia ku ta surgi aki.
Sindikalismo ta felisitá i gradisí tur trahadó profeshonal i eksperto ku ta hasiendo esfuerso enorme pa kontené nos salu i bienestar. Tambe palabra si kombibensia na famianan ku a sufri pèrdida di nan ser kerí, pronto rekuperashon pa tur ku ta enfermo, sr. St Jacobs a terminá bisando.
