‘Ta gobiernu mes ta keda kansela reunion’
WILLEMSTAD.- Gobièrnu a presentá den e reunion di plataforma di konsulta ku sindikatonan, GOA ku un karta den kua ta indiká ku ke yega na un manera mas efisiente di funshonamentu. Mas efisiensia ta un di e puntonan ku minister di Maneho di Gobernashon, Planifikashon i Servisio Públiko, Shalten Hato a duna komo motibu pa a posponé sigur 2 reunion di e plataforma den luna di yanüari.
Un di e maneranan ku segun gobièrnu por trese mas efisiensia ta pa instituí un solo komishon ku ta atendé ku tur tópiko pendiente. Esaki mester remplasá e diferente komishonnan pa kada un tópiko. Sindikatonan representá den e Komishon Sentral di sindikatonan no ta di akuerdo ku e ponensia aki.
Nan no ta kontra ku ta buska maneranan pa strukturá reunionnan di GOA di un forma mas efisiente, pero ta mustra ku tin tópikonan ku ta data for di 2014/2015 ku te ainda no a kaba di atendé den GOA. Ta trata di puntonan manera struktura salarial nobo, i un di e motibunan pa esaki ta pasobra ta keda posponé reunionnan te ku a yega na e situashon ku ta aden awe. Presidente di sindikato SAP, Amado Vilchez ta di opinion ku e konteksto real di GOA ta ku ta gobièrnu no ta efisiente pasobra ta gobièrnu ta pidi kada bes pa posponé reunionnan.
Vilchez ta sigui bisa ku ta pa e motibu aki el a bisa den un deklarashon anterior ku e ta duna minister Hato e benefisio di duda, pero realidat ta keda ku semper lo tin opservashon krítiko riba desaroyonan i moveshonnan ku gobièrnu ta hasi. Na su opinion ora ta boga pa un funshonamentu mas efisiente di GOA e meta semper mester ta ku esaki ta resultá den mihó funshonamentu di e aparato públiko i tambe pa un mihó posishon hurídiko di e ámtenar. Den e kuadro aki el a menshoná ku ya 52 porshento di empleado públiko ta pegá nan e “schaal” mas haltu di nan salario sin ku tin un perspektiva pa nan.
“Nan no ta haña oumento di salario i nan base pa penshun (“pensioengrondslag”) ta keda pa añanan largu mesun kos. Ta e ámtenarnan aki ta siña e profeshonalnan yòn ku ta drenta e aparato e trabou. Esnan yòn ta hasi karera i kana bai dilanti den salario miéntras ku esnan di mas edat ta keda pegá kaminda nan ta. Esaki ta un forma di deskriminashon.”
Kompensashon
Otro ehèmpel ku Vilchez a duna pa un forma mas efisiente di funshoná di gobièrnu ta e kompensashonnan ku a disidí di paga ámtenarnan e biaha aki, manera bónùs fin di aña i ‘bashí premie’ den yanüari. “Gobièrnu a saka un sirkulario pa anunsiá e pagonan aki ku ta tuma lugá un solo biaha, sin a bin GOA promé. Regla ta ku promé ku gobièrnu saka un sirkulario ta bini GOA ku esaki promé.”
Vilchez ta sigui bisa ku ora reklamá ke bisa ku ta kontra e gobièrnu sindikatonan ta, pero no ta esei ta e kaso. “Ta gobièrnu no ta kumpli ku regla i palabrashon. Awó mi ta puntra: e pago di bónus ta un stùnt polítiko promé ku elekshon?”
E presidente di SAP mes ta kontestá esaki bisando ku si no tabata un stùnt polítiko mester a bini GOA ku proposishon pa regla pago di bónus i tur otro tipo di pago permanentemente den lei. “Alabes lo pone sèn riba presupuesto pa esaki. E gobièrnu ta bisa ku e ta pa pueblo i ku pueblo pero ora ta bini ku kosnan pa un solo biaha asina mi ta puntra mi mes ta ku kua pueblo e gobièrnu ta, pasobra no mester trata di kue e empleado públiko ku bakoba.”
Foto:
…Amado Vilchez…
