Gobièrnu no ta kumpli ku Selikor; hopi sushi para ta warda

WILLEMSTAD.- Despues di tabata den akshon siman pasa, ayera e trahadónan di Selikor a kuminsá traha bek. Esaki a tres e kuné ku tur kaminda tin klikonan para rant rant di sushi te basha over.

EXTRA a papia ku Frensley Sille presidente di BTG ku ta representá trahadónan di Selikor i el a bisa ku ayera e trahadónan a bai trabou bek.

Pero banda ku nan tabata den akshon tin diferente situashon ku Selikor ta enfrentando. Esun prinsipal ta ku gobièrnu no ta kumpliendo ku Selikor manera mester ta.

Banda di esei tin diferente negoshi den horeka ku tin kontrakt ku Selikor pero debí na e krísis di Covid, vários tabata sera i entrada ménos pa e kompania ku ta rekohé sushi.

Selikor mester a tuma medida di entre otro stòp ku trahadónan di ‘Uitzend’ Buro i a hinka trahadónan di Selikor mes den e trabou di rekohé sushi den barionan.

Mas aleu Selikor no ta paga overtaim tampoko mas pero ta duna taim bek. E ta trese kuné segun Sille ku trahadónan tin di bai ku nan taim bek i atrobe no tin sufisiente trahadó pa hasi e trabounan ku mester keda hasi i a kumpli ku pueblo.

Sr Sille a bisa EXTRA tambe ku nan tin problema ku ekipo i no tin sufisiente sèn pa por kumpra piesa pa asina pone e ekiponan bek riba kaya.

Esaki ta e realidat di Selikor di awe i e konsekuensia ta e kantidat di klikonan riba kaya, kachónan ta tumba esakinan i sushi plama aki i aya manera e fotonan aki ta ilustrá.

 

SHARE

LEAVE A REPLY