WILLEMSTAD.- Gobièrnu di Kòrsou ta kalkulá ku e tereno di Sehos tin un balor di mas ku Cg. 11.7 mion. Esei ta loke e ta bisa den su Reportahe Finansiero dje di dos kuartal di aña 2026. E reportahe ta bisa ku den un veredikto di Korte di Promé Instansia dia 11 di yüni 2025 a deklará Fundashon Hospital St. Elisabeth (Sehos) komo bankarota. Ta importante pa informá atrobe ku Sehos tin un debe habrí serka Pais Kòrsou di Cg. 34.6 mion. Teniendo kuenta ku esaki, Pais Kòrsou a keda apuntá komo e kobradó prinsipal. Pero den Konseho di Minister a bin ta deliberá pa yega na un solushon p’e problema akí den kual e tereno riba kual e hospital bieu ei Sehos ta konstruí lo por ser traspasá pa Pais Kòrsou. Den kaso ku esaki keda realisá, e suma ku tabatin pendiente komo debe serka gobièrnu lo por keda deskontá.
Den un kaso asina’kí lo no ta nesesario pa forma un provishon pa kobransa dje Cg. 34.6 mion ya ku lo bai tin traspaso di e aktivonan. N’e momentunan aki Pais Kòrsou ta disponé di un rapòrt di balorashon (‘taxatie’) dje tereno kual ta data di sèptèmber 2022 i den kual a kalkulá e balor di merkado na Cg. 11.7 mion. Pero gobièrnu ta spera riba un rapòrt di balorashon aktualisá. Teniendo kuenta ku e desaroyonan mas resien i subida di balor den aria di Colon, ta spera ku e balor aktual dje tereno lo ta muchu mas haltu ku esun ariba menshoná. Teniendo kuenta ku ainda mester bini klaridat riba un ke otro, a kalkulá un provishon na un montante di Cg. 22.9 mion, ku ta e restante dje debe di C. 34.6 mion ku Sehos tin serka gobièrnu.
