WILLEMSTAD.- Gobièrnu di Kòrsou bou di e nòmber “Bibando den Bario” porfin ta bai hiba e programa di bakunashon den barionan di Kòrsou. Esaki ta parse di ta bini nèt na ora pasobra den último dianan por a mira un baha skèrpi atrobe di kantidat di siudadano ku ta bai un di e sentronan di bakunashon pa tuma nan bakuna.
E siman aki, esta e siman di 26 aprel pa 2 mei ta inisiá ku e proyekto piloto aki den algun bario. Despues lo evaluá e programa promé sigui na gran eskala den mas bario. E programa di registrashon i bakunashon den bario lo tin un durashon di mas òf ménos 2 luna. Pronto por spera komunikashon ofisial di parti di gobièrnu riba inisio di e programa aki.
Riba e dianan di e programa di bakunashon den bario algun ‘bùs di bakuna’ lo stashoná na puntonan sentral den barionan di Kòrsou. Abitantenan di barionan mas chikí situá de besindario di un unidat mobil di registrashon i bùs di bakuna ta haña e oportunidat pa usa un “shuttle bus” grátis pa asina nan tambe tin transporte pa e sitio di registrashon i bakunashon.
Aktualmente tin mas òf ménos 70 mil persona ku a tuma e bakuna miéntras ku e meta ta pa yega na 106 mil persona pa fin di luna di mei. “Bibando den bario” ta un proyekto di registrashon i bakunashon den bario ku e meta pa yega mas serka di tur habitante di Kòrsou”, direktor di sektor di salubridat públiko, Melissa Arias ta skibi den un karta.
E karta ta sigui bisa ku tin vários barera ku a pone ku un persona ku ke bakuna no ta logra registrá òf no ta logra yega na e sentronan eksistente di bakunashon. Algun di e motibunan aki por ta relashoná ku e situashon sosio ekonómiko òf mobilidat di e persona. Gobièrnu di Kòrsou konsiente di esaki a inisiá un programa di bakunashon mobil pa drenta den diferente bario na Kòrsou pa asina yega muchu mas di abitantenan.
E meta di e programa di bakunashon den bario ta pa krea oportunidat igual pa un i tur ku ta deseá di bakuná kontra Cobvid-19, Arias ta sigui bisa. Ta e intenshon pa hasi mas tantu posibel di kanalnan di komunikashon eksistente, tantu formal komo informal pa yega serka di e komunidat. Gobièrnu lo traha den estrecho koperashon i ku sosten di diferente organisashon den bario, grupo i lidernan den diferente bario pa asina uni forsa pa hasi e programa di bakunashon den bario un éksito.
Huntu ku e aktornan menshoná lo yuda identifiká i krea un strategia pa mobilisá mas tantu habitante den bario posibel ku ta enkontrá kualke barera pa bakuná òf registrá pa bakuná.
