Forsanan di seguridat ayera a akudí na El Helicoide -prizòn di gobièrnu venezolano usá pa servisio di Inteligensia Nashonal Bolivariano – kaminda a duna kantidat di prezu nan libertat.
CARACAS (AFP).- Venezuela ayera a duna libertat na un “kantidat grandi” di prezunan pa motibunan polítiko, segun hefe di Parlamento, den un konseshon importante dje gobièrnu interino despues dje kaptura di Nicolás Maduro. Ta trata dje promé grupo di prezunan venezolano i strañero kendenan ta haña nan libertat bou presidensia interino di Delcy Rodriguez, kende ta okupá e puesto despues dje atakenan militar di Merka djasabra último.
“Pa e kombibensia pasífiko e gobièrnu bolivariano huntu ku institushonnan di estado, a disidí na pone den libertat un kantidat grandi di prezunan venezolano i strañero”, segun e hefe di Asamblea Nashonal, Jorge Rodriguez, ruman dje mandatario interino. “E prosesonan aki pa saka hende for di prizòn ta tumando lugá na e momento aki mes”, segun parlamento venezolano, sin duna sifra presis dje kantidat di persona.
E organisashon di derechinan humano Foro Penal ku anteriormente a referí na un kantidat di 806 prezu pa motibunan polítiko na Venezuela, di nan175 militar, ayera a selebrá e “bon notisia”
“Alivio” despues di yamada di Petro
Presidensia di Colombia a informá ku Delcy Rodriguez lo bishitá Bogotá riba un fecha ku ainda mester keda disidí, pa e reuní ku e mandatario Gustavo Petro. Ta konosí ku e presidente kolombiano a informá di ke “kontribuí na un salida pa krísis polítiko na Venezuela”. Petro tabatin un bon kombersashon telefóniko djarason ku Donald Trump, kende poko dia promé a menasá na ataká Colombia. Nan dos a akordá pa bini ku “akshonnan konhunto” pa gòlpia e gueria ELN, ku ta operá na frontera ku Venezuela, segun e minister di interior, Armando Benedetti.
Despues di lunanan di tenshon, e klima entre Colombia i Merka ta di “alivio i trankilidat” despues dje yamada, pero “no tin ambiente di triunfo”, segun e vise kansier Mauricio Jaramillo a bisa na AFP.
Un motosiklista ta kore pasa riba un muraya riba kua a skirbi un teksto sklamando pa libertat pa presidente Maduro i su kasá Cilia.
