NEW YORK (AFP).- E konteo abou pa loke ta kasonan di Coronavirus na Venezuela i tambe e kantidat di morto probablemente ta falsu, i defakto lo por ser multipliká ku algun mil hende komo víktima. E ta muchu mas haltu ku loke ofisialnan den e pais ta pretendé i esei di akuerdo ku e organisashon di Human Rights Watch i tambe John Hopkins University.
T’asina ku e gobièrnu di presidente Nicolas Maduro a reportá un kantidat di 10 morto kousá dor di COVID for di 1.121 kaso den e pais ku ta konsistí di 30 mion hende. E dos organisashonnan ariba menshoná ta konsiderá e sifranan aki komo apsurdo.
“Nos ta kere ku e datonan, e estadístikanan ku gobièrnu Venezolano ta dunando di parti di presidente Maduro ta apsolutamente apsurdo i no ta konfiabel. E direktor di HRW pa Amerika, Jose Miguel Vivanco a duna di konosé durante un konferensia via video ayera ku e no ta kere e informashonnan ei.
Nan ta kere ku e sifra real lo por ta hopi serka di por lo ménos 30.000 morto kousá pa Coronavirus, esei di akuerdo ku e profesor di medisina asosiá, Kathleen Page, kende a hasi entrevista ku diferente dòkter enfermero Venezolano pa su reportahe.
Vivanco a deklará ku e idea di reportá asina tiki kaso i morto den un pais kaminda dòkternan apénas tin awa pa laba nan mannan i e sistema di salubridat ta kayendo den otro ta tacha nan kredibilidat.
Page a bisa ku gobièrnu Venezolano a raportá ku nan a hasi mas di 300.000 tèst di Coronavirus, pero ku e tèst ku nan ta usa ta konosí di ta duna hopi resultado falsu. Pues e ta kalkulá ku 1 porshento dje poblashon, pues un 300.000 hende lo por ta infektá.
