BOGOTA, COLOMBIA, AP.- E gobièrnu kolombiano i gueria di FARC firma un akuerdo di género na La Habana ku ta buskando un inklushon mas grandi den e pais pa muhénan i miembronan di e komunidat LGBT. “E inklushon di un enfoke di género den un proseso di pas manera esaki no tin antesedente na mundu i ta purbando pa krea kondishonnan fundamental pa muhé i personanan ku un identidat seksual diferente por eksedé den igualdat di e kondishonnan aki i biba de un pais sin konflikto armá”. Asina e dos partinan a bisa den un komunikado konhunto den e kapital kubano.
E bosero ofisial, Maria Paulina Riveros, un di e integrantenan di e ekipo negosiadó di e Ehekutivo, i FARC a keda representá pa e komandante gueriero Viktoria Sandino.
Segun e rapòrt ofisial, e inkorporashon di un enfoke di género den akuerdonan alkansá, ta drai rondó di ocho tema. E temanan aki ta inkluí” akseso i formalisashon di propiedat rural den igualdat di kondishon; garantisá di derechonan ekonómiko, sosial i kultural di muhé i personanan ku un identidat seksual diferente di e sektor rural. Ademas, e ta kontemplá e promoshon di partisipashon di muhé den espasio di representashon, pa tuma desishon i resolushon di konflikto; medidanan di prevenshon i protekshon ku ta atendé e riesgonan spesífiko di muhé; akseso na bèrdat, hustisia i garantia ku no tin ripitishon; rekonosimentu públiko; difushon di labor realisá pa muhénan den asuntunan polítiko; asuntunan institushonal pa fortalesimentu di organisashon di muhé i movementu di LGBT a su partisipashon polítiko i sosial i sistemanan di informashon transparente.
