WILLEMSTAD.- Reforma di merkado laboral mester tin komo enfoke ku ta fortifiká e forsa laboral di Kòrsou pa futuro. “Mi enfoke ta konsentrá riba krea oportunidatnan di trabou i protehá derechonan di trahadó, pa sigurá ku e merkado laboral di Kòrsou ta kuadra ku demanda di un ekonomia diversifiká.” Asina parlamentario pa KEM, Anthony Godett, ta opiná.
Pa logra esaki Godett ta bisa ku mester kombatí empleo ilegal, protehá trahadónan i asina sigurá kompetensia hustu riba merkado. Tambe e ta di opinion ku mester revisá i modernisá leinan di labor di pais. Entre otro, mester revisá e lei di labor relashoná ku kontratonan kòrtiku. “E leinan di labor mester reflehá e kondishonnan moderno di trabou i derechonan di e klase trahadó. Esaki ta inkluí protekshon pa trahadónan den e ekonomia moderno di awendia kaminda tin mas empleado ku ta traha ‘part-time’ i tambe empleadonan di sektornan nobo di teknologia i industria kreativo.”
Leinan laboral mas moderno, segun Godett, mester reflehá nesesidatnan di un ekonomia diversifiká, p’asina sigurá ku tantu doñonan di trabou komo e klase trahadó ta haña trato hustu i protekshon. Tambe e ta haña ku mester tin mas atenshon pa desaroyo di e forsa laboral pa elevá abilidatnan di e trahadó ku mester ta kapas pa prosperá tantu den sektornan kresiente komo den teknologia, energia renovabel i industria kreativo.
E parlamentario di KEM ta boga mas aleu pa sigui oumentá suèldu mínimo di 15 florin pa ora entrante yanüari 2026 i pa laga esaki konta te ku 2029. Pa Godett esaki ta un kompensashon huntu pa ora e klase trahadó. Alabes Godett ke hasi su mes fuerte pa bini ku programanan pa asina kobradónan di ònderstant ta integrá den e proseso laboral.
Esaki ta redusí e kantidat di kobradó di ònderstant pues, gastu di gobièrnu i alabes krese e forsa laboral di Kòrsou kaminda tin mas hende ta kontribuí den kaha di gobièrnu ku impuesto i prima sosial. “Meta ta, pa redusí dependensia sosial riba término mediano i largu ku mas òf ménos 25 porshento i oumentá partisipashon laboral bou di partikularmente hóbennan, hendenan muhé i gruponan vulnerabel.”
Otro meta di e parlamentario ta ku mester legalisá, pa medio di lei, e situashonnan no hustu di ‘uitzendbureau’. Finalmente Godett ta mustra ku den añanan benidero mester reforsá sekshon di Inspekshon di Labor (‘Arbeidsinspectie’) pa esaki funshoná optimal i ta dirigí riba su meta di kontrolá riba kumplimentu ku leinan laboral. “Ami su plan di trabou lo ta, pa Inspekshon di Labor disponé di sufisiente rekurso, konosementu i fakultat, p’asina por mantené un supervishon efektivo riba kumplimentu di lei i regulashon.”
Foto:
…Anthony Godett…
