NEW DELHI, INDIA, AFP.- E empresa merikano di internèt Google a anunsiá djaluna ku lo invertí 10.000 mion dòler na India den e próksimo sinku pa shete añanan, pa “aselerá e ekonomia digital”.
Ku un pueblo hóben i kada bes mas konektá ku internèt, India ta un merkado prometedor pa e empresanan aki. Facebook i Amazon tambe a invertí miónes di dòler den e último añanan ku a pasa.
Mediante invershon i asosiashon, e “fondo pa digitalisashon” kual Google a pone disponibel pa India lo fasilitá akseso na informashon riba internèt den diferente idioma den e pais i lo mehorá introdukshon di teknologia digital.
E presidente di Google a reuní ku e promé minister Narendra Modi djaluna pa inform’é tokante e invershon aki. E mandatario a papia tokante e preokupashon kresiente relashoná ku seguridat di dato online i a pidi e empresa pa “purba yena e défisit di konfiansa aki”, segun un komunikado.
India a prohibí 59 aplikashon chines, inkluyendo e plataforma popular TikTok, pa motibu di seguridat nashonal. Aktualmente India i China su relashon ta tenso dor ku militarnan na frontera di ámbos pais a konfrontá otro, lagando vários morto den Himalaya.
