Restourando fundeshi di Famia, esei ta loke Gracita Daal i Silvana Willems Trinidad a pone atenshon riba dje. Ta trata di un proyekto di restourashon i sana di problemanan i situashonnan ku nos por ta pasando den dje. E proyekto aki a bira realidat basá riba aspektonan ku e mes a pasa aden segun Gracita. Ora el  hañ’é den situashonnan el a kuminsá wak den su mes famia i a ripará ku e problemanan ku e tabata enfrentando, ora e papia ku su mama ta kosnan di su antepasadonan. Asina el a investigá i wak kiko mas tin i na final Gracita a bisa ku e informashonnan ku el a  haña a base di tur loke el a pasa aden, e ke dokumentá esakinan i pone nan disponibel pa otro hende tambe. Pa asina nan por wak den nan mes famia kiko tin i traha riba dje.

Problema di un pa otro

Ora wak famia i wak e problemanan por ehèmpel divorsio por ripará ku tin hopi matrimonio ku no ta felis i ta kai den divorsio. Por wak problema di yunan desobediente, problema di pobresa den famia. Si saka un potrèt awor aki di famia na Kòrsou, tin hopi doló, hopi sufrimentu. I loke ta hasi doló ta ku ta ripará ku nos ta trahando pa solushoná e problemanan pero nan ta bolbe bin bèk. I esaki ta e proyekto di restorashon. E proyekto no ta wak solamente e hende su problema, pero analisá, wak den famia, wak e fundeshi. Fundeshi ta importante i p’esei mester wak kon esaki ta. Ora analisá e fundeshi aki por bin bei ku tin kosnan ku ta bolbe pasa bèk.  Mester konkluí ku esaki no ta algu insidental ku abo so a pasa den dje, pero e ta muchu mas profundo i ku mester di un aserkamentu ainda mas profundo.

 

Un bon fundeshi

 

Ora nos ta papia di famia i un bon fundeshi, Gracita a bisa ku mester wak nos ‘mindset’. Mester wak e hende su forma di pensa. Un fundeshi ta bin na eksistensia den lokual esun famia ta pasa pa otro. Den sentido ku mi balornan, ki sorto di balor ami tin komo balor, mi prinsipionan i e balornan i prinsipionan ei ta nan ta forma e fundeshi. Ta nan ta disidí ken abo ta i basa riba esei kon ta bira bo destino. Mester kompará bo fundeshi komo esun spiritual meskos ku fundeshi di e kas. E kas bo no ta mira e fundeshi pasobra e ta parti di e kas. Pero e fundeshi ta determiná ki sorto di konstrukshon a pone riba dje. Mesun kos ta konta pa e hende. Nos fundeshi ta determiná ki tipo di bida nos ta destiná pa tin. Un fundeshi suak hamas i nunka e por produsí famia kaminda ta ekselá den bida. I esei ta importante den bisa esta pa tin fundeshi stabil pa e hende ekselá den bida.

Kibra ku maldishon

Pa loke ta e proyekto di restourashon i un bon fundeshi, sra. Gracita a bisa ku nan ta duna retiru. Nan ta ofresé e informashon aki a base di retirunan. Loke ta importante ta ku ta un proyekto spiritual. Palabra di Dios ta siña  nos ku falta di konosementu hende ta bai pèrdí. I loke nan ta konstatá ku e konosementu ei no tei. Ora hende wak su problema e no sa ta dikon e ta den e problema ei. I loke ta purba e ora ei ta duna e enseñansa pa medio di retiru, kaminda ta duna splikashon i informashon pa hende rekonosé e kousa di su problema. Nan ta bisa ku prinsipalmente e kousa ta ku e antepasadonan no a biba konforme e reglanan ku Dios a duna. I ora tin desviashon, beibel ta bisa bon kla ku kaminda tin desviashon tin maldishon. I ora mira tur esakinan ta resultado di nos antepasadonan i asina por komprondé e motibu ku loke e hende ta pasando aden ta un maldishon. Den e proyekto ta siña rekonosé maldishon i traha riba dje pa kibra i asina por haña un bida muchu mas felis. I ounke ta papia di beibel, e proyekto aki no ta mara na un religion segun sra. Gracita Daal. El a splika ku ta un proyekto bíbliko. Loke nan ta wak ta kiko Dios a bisa, kiko Dios a pone den su palabra komo regla pa nos biba i esei nan ta siña e hendenan. Dios a pone un kuadro pa hende biba den dje i pa nan ta importante pa hende sa ku e kuadro ei tei i kiko Dios ta ferwaktu di nos.

 

Gracita Daal

Resaltá

Ora ta papia di problemanan ku komunidat na pasando aden, Gracita Daal a bisa nan no por bisa ta kua ta resaltá. Nan no por bisa kua problema ta resaltá den sentido ku mester hasi un análisis i pa papia di kua problema ta resaltá. Pero ta bin aserka ku hende no ta gusta kombersá i bisa kua problema nan tin. Pero for di e proyekto nan ta konstatá ku problema di matrimonio, problema di divorsio, enemistat den famia, eseinan ta bin dilanti hopi. Pero si e wak korant e ta mira pobresa ta resaltá. I Gracita ta kere ku mester bin un investigashon pa sa spesífikamente kua ta e problema di famia i pa ora pone ‘vergroot glas’ por sa kua ta e problema spiritual. Nan ròl ta pa yuda e hende pa atendé e problema spiritualmente.

Hende no ta papia fásil

Gracita a sigui konta nos ku nan a ripara ku hende ta skonde nan problema i pone un máskara di kiko realmente nan ta sinti i pasa aden. Nan a ripará ku ora ta papia ku hende, e ta papia si pero no ta bisa tur kos. E hendenan ku nan a haña den e retirunan ta hendenan ku a pasa over di esei. Ta hendenan ku realmente ke traha riba nan problema. Si un hende no ke habri su mes, e no por traha riba su problema tampoko. Pa nan ta importante pa e hende atendé ku su fundeshi pasobra si no atendé ku esaki e ta pasa over pa nos yunan, nietunan. E ta trese sufrimentu pa hende inosente i niun hende ke pa nan yunan i nietunan sufri.

 

Konstruí i rekonstruí pa bai dilanti

Silvana Willems Trinidad

Silvana Willems Trinidad di su parti a konta nos ku for di yòn el a traha riba su fundeshi sin e tabata sa. Por ehèmpel ora e tabata hóben el a wak su mama i tambe su tata. I el a wak kiko su mama tin ku e ta gusta i kiko e no ta gusta. Meskos ku su tata. I el a wak kiko e tin di nan ku e no ta gusta i riba e kosnan ei el a bai traha. Silvana tabata ke ta un mihó vershon i mas mihó di loke el a haña. Na momentu ku Gracita a bis’é di e retiru i pa e duna yudansa den organisashon lógikamente e tema a interesá Silvana. E retiru tabata algu fenomenal. E ta habri bo bista i bo ta komprondé kosnan mas spesífiko. Un retiru ta ku bo ta retirá for di bo kosnan diario, apartá bo mes pa un òf dos dia i bo ta bai den e programa aki. Retirá bo mes pa bo kabes no tin nada di kòrda kiko ta eifó, kiko e bida diario ta i simplemente dediká i e programa ta hiba bu na e fundeshi. Na un manera masha simpel e ta kana yega einan. Hopi bia kosnan ta kompliká i e hende ta desha i ta kere ku e kos ei no ta pe. Ta un programa simpel pasobra e problemanan di famia ta problemanan komun. Por ehèmpel pa sa kua problema tin, wak bo mes i ora bo analisá kiko t e kosnan ku ta pasando i analisá si nan a pasa den pasado, den mama tata etc., e ora ei por ripará ku ta kosnan ku ta pasa di un pa otro. Por ehèmpel ripará ku niun hende ta kaba skol den famia, ku den famia tin hopi hende ta kai sea òf ku den e famia kasi niun hende ta kasa òf ku tin hopi hende ku no ta haña yu òf ku kisas ta haña asta hopi yu. Asina ta mira ku e problema ta pasa di un pa otro den famia. I ta keda na e hende pa disidí si e ta lag’é pasa pa su generashon tambe. I ta esaki ta e proyekto, esta pa trese e hende pa mira i analisá kiko ta e problemanan den bo fundeshi ku bo a haña di bo antepasadonan i a bin kuné sin sa. E ta un oportunidat pa wak den fundeshi i ta haña e hèrmèntnan kon pa hasi reparashon na bo fundeshi i kibra ku e kosnan bo no ke den bo fundeshi. Den e proyekto aki ta haña e oportunidat i guia pa yega kaminda ta realisá e problemanan, pa kibra nan, basha bou, konstruí i rekonstruí i asina bo ta bai dilanti.

 

Retiru

Tabata e intenshon pa dos bia pa aña òf si tin demanda mas bia organisá retiru. Pero covid a dal aden i no por a hasié. Pero a sigui si di un pa un; personalmente tabatin hende ku kier a sigui traha i asina a hasié. Awor ku tur kos a kalma ta bai sigui ku e retirunan. Ora tin fecha pa retiru., hende por inskribí pa esakinan. Ta skohe lugánan konfortabel. I ta masha dushi pa ora saka e  hende di su zona konfortabel pa dun’é un kaminda ku e por rilèks, drumi, sosegá i usa su tempu pa e relahá i haña siñansa. I asina e ta bai bèk den tur loke el a risibí i pa e hende por bira konsiente di e problema. I loke ta importante ta ku e hende mester ta disidí pa bai traha riba su fundeshi. Promé ku e retiru tin informashon pa e hende por sera konosí ku e programa i despues e hende por disidí ku e ta inskribí pa e retiru. Ta diferente paso tin promé yega asina leu. Pa informashon pa esaki por yama  5139816. I si e persona tin urgensia nan ta purba atendé mesora i no tin mester di warda te na momentu di e retiru.

 

Buki restourando fundeshi familiar

Banda di e proyekto di restourando, Gracita Daal a skibi un buki ku yama Restourando Fundeshi Familiar. El a splika Djasabra ku nan tin asina tantu informashon i no ke wanta tur e informashon ei. P’esei e buki ta pa tur hende por siña di dje. For di e buki por sa kiko ta un fundeshi, kon e ta forma, kon rekonosé un fundeshi. Tin fundeshi di matris, fundeshi di antepasadonan etc., etc.. I den dje tin testimonio di personanan ku tambe a pasa dor di e retiru i kon nan a eksperensiá esaki. E buki ta optenibel na librerianan i na Kas di Beibel.

 

 

 

 

 

 

 

 

LAGA UN KOMENTARIO

Please enter your comment!
Please enter your name here