WILLEMSTAD— Siman pasá a drenta e tristu notisia ku Cedric “Secho” Curiel a fayesé na Colombia despues di un operashon. Cedric tabata miembro di e ekipo Los Amigos di Liga 60 ku ta hunga tur djadumingu na Frank Curiel Ballpark. Cedric “Secho” Curiel tabata un gran kabayero tantu paden komo pafó di tereno. Liga 60 ta di luto i djadumingu último a tene un minüt di silensio pa Secho na momento ku e ekipo Los Amigos tabatin e turnó di barwacht na Frank Curiel Ballpark durante e weganan di e liga. Secho Curiel tabata un gran amigu di Frank Curiel i tabata sòru pa tur loke ta èrko, frizer, frishidèr i tur kos di elektrisidat na Frank Curiel Ballpark ta na òrdu.
Cedric Curiel a kuminsá hunga beisbòl for di chikí i despues el a pasa pa Sòftbòl Slowpitch i Beisbòl Veterano. Último tempunan e tabata hunga Sòftbòl den Liga 60 i Liga 50. Hopi ta konosé Secho na Wimco komo un gran eksperto den drecha frizer, frishidèr i wasmashin. Nos konosé Secho for di tempu di e ekipo Eagle Liverpool den Klase A di beisbòl den komienso di añanan ’80, i despues huntu ku Secho den e tim Sigui Gosa mei mei di añanan ’80 den Liga Un i Tur. Un gran kabayero kla pa yuda tur hende ku a militá den espesialmente timnan di Bonam manera Fria Kabes, Poison i despues pa Sigi Gosa, Baranka, Dream Team 40 serka Gibi Henrietta, i den Beisbòl Veterano ku e ekipo Eagle i despues ku Azucar i Yesterday 50+. Den Liga 40 Sòftbòl Secho a militá den Rising Trotters, den Liga 50 despues ku Pitufos, Artemisia, den 60+ tambe ku e ekipo Pitufos i último añanan ku e ekipo Los Amigos ku el a stimá masha tantu. Djaweps tin bishita di kondolensia pa Cedric “Secho” Curiel. Entiero probablemente lo ta djadumingu.
