3rd Curaçao Open Challenge World Cup
WILLEMSTAD.- E Gran Maestro ruso Alexander Georgiev a titulá kampion dje 3rd Curaçao Open Challenge World Cup di dam. Den oranan trempan di ayera nochi a realisá e premiashon den Ballroom di Marriott Hotel despues di un siman di kompetensia intensivo ku a trese Kòrsou desenas di hungadó di dam for di práktikamente rònt mundu. No menos ku 62 praktikante for di 19 pais tabata presente den e evento.
Tabata un anochi di premiashon pa koroná e trabou ku e hungadónan a bin ta realisá, entre nan varios hungadó lokal.
Alexander Georgiev a komandá e kompetensia i a laga na di dos lugá e Gran Maestro hulandes Kees Thijssen, mientras ku e polaka Natalia Sadowska a okupá e terser puesto. Mas aleu entre e promé dies tabatin hungadó for di Belarus, Rep. Dominicana, Cuba i Surnam.
Pa loke ta trata e hungadónan lokal, Rudsel Wolf a finalisá komo esun mas haltu, bnon pa puesto nr.19. Su tras a sigui Mjail Eisden, ku Raoul Alias na terser puesto entre e lokalnan.
Workshop
Aktividat di dam no a yega na su final, ya ku for di awe te ku 21 di novèmber lo tin un workshop ku e Gran Maestro di Belarus Anatholi Gantvarg. Tur hungadó lokal di dam por partisipá, tur anochi di 6’or pa 9’or na Kas di Dam, situá riba FD Rooseveltweg (Galeria Sta. Maria).
E promé tres damanan, enkabesá pa Natalia Sadowska.
E tres hungadónan lokal ku a finalisá mas haltu den klasifikashon. Rudsel Wolf (meimei) nr. 19, Mijail Eisden (r) nr. 27 i Raoul Alias (d) nr. 32.
Presidente di Federashon Dam Kòrsou i e motor tras dje evento, Clifton Agatha, tambe a risibí un rekonosimentu.
E diferente partisipantenan a keda premia durante e akto di klousura ayera nochi.
