ORANJESTAD.-Polis di Aruba ta informá ku despues di trabou inkansabel outoridatnan a logra detené sospechosonan ku tabata atraká adultonan mayó. E grupo ku tabata echa e bainanan aki ta konsistí di 1 hóben di 15, 2 hóben di 16 aña i un persona di 31 aña.
E tim di reshèrshi di San Nicolas a traha duru pa solushoná e diferente kasonan di robo riba adultonan mayor na San Nicolas.
E sospechosonan tabata pusha e grandi di un forma ku e persona di edat ta kai òf ta keda indefenso. Despues e sospechosonan, menor di edat, ta hòrta pertinensianan di e bieunan.
Den un forma relámpago, bon kordiná ku konosementu den e materia di investigashon, reshèrshi di San Nicolas konhuntamente ku Kuerpo Polisial Aruba por informá tur hende grandi ku a logra detené te ku awor 4 sospechoso relashoná ku e kaso aki.
Hopi tristu pero ta 3 ménos di edat i un adulto tabata kometé e kasonan aki.
Ta trata di e sospechosonan di inisialnan; T.J. G. B. nase na Aruba di 15 aña di edat, J. D.J. T. nase na Aruba di 16 aña di edat, E.J.E.K. nase na Aruba di 16 aña di edat i G.V.F. nase na Aruba di 31 aña di edat.
reshèrshi di San Nicolas no a para ketu y den mesun rosea a detené e sospechoso K.J.A.S. nase na Aruba di 40 aña di edat, pero esaki ta relashoná ku kasonan di ladronisia riba diferente kasnan na unda mayoria ta adulto mayor ta residensia. No ta deskartá ku den e dianan ku ta sigui outoridatnan lo hasi mas detenshon.
